Diretór Ezekutivu Klínika Bairru Pité, Daniel Murphy. Imajen Jogerjo Guterres

DILI, 14 abríl 2020 (TATOLI) – Diretór Klínika Bairru Pité, dr. Daniel Murphy, kalan ne’e maizumenus tuku 20.30 hakotu iis iha ninia rezidénsia Praia dos Coqueiros.

Jestór klínika Bairru Pité, Inácio dos Santos, ba TATOLI via telefone katak matebian mate derepente no laiha sintoma ba moras ruma.

“Horiseik Diretór Klínika (matebian) sei konsulta hela pasiente sira ne’ebé mak mai halo tratamentu no nia kondisaun ne’ebé mak di’ak, maibé ohin kalan maizumenus 20.30 Otl,  simu telefone husi oan feto ne’ebé hela ho doutór katak doutór hakotu iis”, haktuir Inácio.

Jestór Klínika ne’e hatutan, ohin nia mós simu kontaktu hosi matebian hodi subtitui médiku balun hodi halo konsulta ba pasiente sira, tanba sente isin kolen no promete sei tama hikas servisu iha kuarta (15/4/2020), aban.

“Entaun, tuku 20.30 hanesan ne’e nia oan feto ne’ebé mak hela ho nia telefone ha’u katak doutór toba la book án ona, entaun ha’u ba klínika ne’ebá telefone ambulánsia husi nasionál mai ho ekipa médiku sira, ami konsege ba nia rezidénsia, maibé doutór iis laiha ona”, nia esplika ho tanis.

Hodi hatutan tan, durante sei moris, Fundadór Klínika ne’e sempre husu ba jestór ne’e atu hakoi nia iha areadór klínika Bairru Pité no rejeita atu lori fila nia isin mate ba nasaun orijén Amérika.

Mezmu nune’e, hosi parte klínika sei kontaktu ba matebian nia família no oan na’in rua iha Amérika hodi foti desizaun.

“Nia dehan mai ha’u katak bainhira ha’u hakotu iis, hakoi ha’u iha portaun klínika Bairru Pité para ema tama sai bele haree ha’u”, nia haktuir.

Doutór Daniel Murphy hakotu iis ho idade 79, mate-isin matebian daudaun ne’e rai iha ninia rezidensia.

Matebian mós husu atu jestór ne’e kontinua jere klínika Bairru Pité hodi halo tratamentu ba ema hotu liliu ba ema ki’ak sira.

Jornalista : Felicidade Ximenes

Editór      : Agapito dos Santos

HAKEREK NO HATÁN

Please enter your comment!
Please enter your name here