Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 14 abríl 2020 (TATOLI) – Ministru Obra Públika, Salvador Eugênio Soares dos Reis Pires, informa ekipa Task Force hahú rekomenda kompañia sira ba Konsellu Nasionál Aprovisionamentu (CNA, sigla portugés) atu halo kontratu tuir parte legál hodi halo rekuperasaun ba inundasaun husi udan boot iha sesta (13/03).

“Ba projetu emerjénsia ne’e, ekipa Task Force rekomenda ona kompañia lubuk ida ne’ebé sei halo selesaun no tuir parte legál ne’ebé sei  haree hela husi CNA no kuandu tuir rekezitu hotu foin selebra kontratu atu kompañia sira hahú halo servisu ba rekuperasaun”, tenik Ministru Salavador ba Agência Tatoli, iha ninia knaar fatin, Caicoli, tersa ne’e.

Konsellu Administrasaun Fundu Infraestutura (KAFI) aprova ona millaun $15 ba kustu estimasaun estragu husi inundasaun, ne’ebé aprezenta husi ekipa Task Force ne’ebé lidera husi Ministériu Planeamentu, Investimentu no Estratéjiku (MPIE) no Ministériu Obra Públika (MOP).

Notísia Relevante: KAFI Aprova Ona Kustu Estimasaun ba Rekuperasaun Estragu Kauza Inundasaun

Ekipa Task Force ne’e, kompostu husi ministériu rua ne’ebé aprezenta ona kustu estimasaun hodi bele halo rekuperasaun ka hadi’a estragu hanesan estrada, ponte, eletrisidade, kanalizasaun bee-moos no eskola sira kuaze obra emerjénsia hamutuk 23, ne’ebé maioria lokaliza iha kapitál Dili, inklui munisípiu balun ne’ebé afetadu husi inundasaun.

KAFI identifika ona lokál hamutuk 23 ne’ebé sira ekipa Task Force sei halo rekuperasaun emerjénsia ba estrada, inklui hadi’a ponte tolu hanesan My Friend, Becusse, Hera, retensaun ba barreira sira, estrada no hadi’a Eskola 5 de Maio, Sergio Veira de Melo no seluk tan.

Sorin seluk, Koordenadór Ekipa Task Force, Rui Hernani, afirma daudaun ne’e ekipa organiza hela obra sira ne’ebé mak hetan afetadu husi inundasaun.

“Ekipa Task Force ne’e tenta indetifika no aprezenta iha KAFI no hetan ona aprovasaun, maibé presiza prepera aspetu legál atu justifika, signifika katak pakote ida-idak tenke iha justifikasaun legál atu tama duni obra emerjénsia atubele kompañia halo rekuperasaun”, nia akresenta.

Atuál Diretór Jerál Obra Públika ne’e dehan, kustu estimasaun ba kalamidade millaun $15 ne’ebé aprova ona iha KAFI.

“Ami la ko’alia ba rekuperasaun uma-kain, maibé ami haree liu ba infraestrutura ne’ebé hetan afetadu husi inundasaun hanesan estrada no ponte kuaze millaun $10, ba eletrisidade millaun $3-resin no ba bee-moos kuaze $700.000, maibé orsamentu ne’e sei la gasta hotu”, nia subliña.

Ekipa Task Force estabelese bazeia ba despaisu husi Primeiru Ministru, Taur Matan Ruak, husi rezultadu enkontru ho KAFI, inklui entidade relevante sira hanesan Ajénsia Dezenvolvimentu Nasionál (ADN), CNA no Sekretariadu Grande Projetu (SGP) no mós ajénsia sira ne’ebé tutela iha MOP hanesan Diresaun Jerál Obra Públika, Servisu Agua no Saneamentu (SAS) no Eletricidade de Timor-Leste (EDTL).

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here