Portavós CIGC, Odete da Silva Viegas. Imajen Tatoli/Egas Cristovão

DILI, 13 abríl 2020 (TATOLI) – Portavós Sentru Integradu Jestaun Krize (CIGC, sigla portugés), Odete Viegas, rejeita informasaun ne’ebé espalla iha públiku katak abitante sira ne’ebé kumpre hela kuarentena, bainhira moras sai ba halo tratamentu iha Hospital Nacional Guido Valadares (HNGV).

Portavós ne’e afirma, abitante sira ne’ebé seidauk kumpre loron 14 konfinamentu obrigatóriu, sei labele sai husi fatin kuarentena tanba estabelese ona regulamentu.

“Ha’u hanoin iha informasaun sira ne’ebé maka sai ba públiku sira katak ema sira ne’ebé maka hela iha kuarentena, sai fali bá iha ospitál nasionál atu halo tratamentu ne’e ha’u atu dehan de’it katak laloos. Iha ekipa médiku mak halo atendimentu ba sira iha kuarentena”, dehan atuál Diretora Jerál Prestasaun Servisu Saúde ne’e, liuhosi konferénsia infrensa, ne’ebé maka hala’o iha Sentru Mídia COVID-19, iha Salaun Sentru Konvensaun Dili (CCD, sigla portugés), segunda ne’e.

Parte CIGC konsidera presiza iha koordenasaun di’ak entre ekipa iha terrenu no mídia sira atu pasa informasaun ba malu.

“Infelizmente dadus ne’ebé maka ita bo’ot sira hetan ne’e ha’u seidauk iha informasaun. Ha’u nia hanoin mídia nu’udar ekipa traballu ne’ebé iha, maibé ha’u hanoin katak atu servisu ne’e ita bele hala’o di’ak ita tenke iha koordenasaun, karik informasaun sira ne’ebé ita bo’ot sira hetan maibé ami seidauk hetan”, dehan Odete Viegas.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here