Komandante PNTL Munisípiu Dili, Superintendente Xefe, Armando Monteiro. Imajen/Egas Cristóvão

DILI, 13 abríl 2020 (TATOLI)– Polísia Nasionál Timor-Leste (PNTL) Munisípiu Dili halo alerta nafatin ba komunidade hotu iha area jurizdisaun  Munisípiu Dili atu hela hakmatek iha ida-idak nia uma hodi prevene-an hosi propagasaun surtu Coronavirus ka COVID-19.

Notísia Relevante :CIGC Anúnsia Tan Kazu Pozitivu Foun Rua ba COVID-19 

To’o ohin loro-kraik, suspeitu pozitivu COVID-19 iha Timor-Leste hamutuk ona ema na’in haat (4), kompostu hosi na’in tolu  iha izolamentu no na’in ida iha rekuperasaun laran.

Ho propagasaun surtu COVID-19, Komandante PNTL Munisípiu Dili, Superintendente Xefe Armando Monteiro, alerta ba komunidade hotu iha kapitál Dili, liu-liu iha kada bairru atu disiplina hodi kumpre regra estadu emerjénsia no haktuir orientasaun hosi Ministériu Saúde (MS) ho Organizasaun Mundiál Saúde (OMS) kona-ba maneira sira prevensaun COVID-19 nian.

Tuir avaliasaun PNTL nian durante implementasaun estadu emerjénsia ne’ebé la’o kuaze semana rua ona hatudu katak, komunidade koopera tebes hodi hatudu katak la’o iha dalan públiku uza máskara, fase-limn ho sabaun no mantein distánsia sosiál.

“Iha  bairru balun, komunidade balun kontinua halibur malu no joga bingo. Tanba ne’e, husu ba komunidade hotu atu iha konsiénsia no disiplina hodi tur hakmatek iha ida-idak nia uma,” afirma Armando Monteiro ba jornalista sira, ohin, iha Otél Luz Clarita, Dili.

Nia hateten, disiplina iha moris sosiedade ne’e fatór importante tebes atu hamutuk luta kontra inimigu invizivel Coronavirus ka COVID-19.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here