Diretora Jerál Prestasaun Servisu Saúde, Odete Viegas. Imajen Tatoli/Egas Cristovão

DILI, 13 abríl 2020 (TATOLI) – Diretora Jerál Prestasaun Servisu Saúde, Odete Viegas, informa daudaun ne’e Ministériu Saúde servisu hamutuk ho Ministériu Turizmu, Komérsiu no Industria, hahú aplika ba ema sira ne’ebé kumpre kuarentena iha otél, ema ida kuartu ida, nune’e bele fásil halo kontrolu no prevene propagasaun surtu COVID-19.

Desizaun ne’e, hafoin iha preokupasaun barak husi ema sira ne’ebé kumpre hela konfinamentu obrigatóriu no públiku rasik, katak iha fatin kuarentena balun ema na’in-rua ka tolu okupa kuartu ida.

“Ministériu Saúde hamutuk Ministériu Turizmu, Komérsiu no Industria, atu koloka ona ema ida iha kuartu ida, hahú horiseik, hafoin ema barak sai no halo kedan dizenfetante. Karik iha ótel balun maka ema rua iha kuartu ida, ami hahú hasai ona atu ita bele kontrola ema sira ne’ebé  iha kuarentena”, tenik Odete Viegas iha Otél Luz Clarita, segunda ne’e.

Diretora ne’e rekoñese, Governu hasai ona medida barak maibé balun nafatin la kumpre, enkuantu ema ruma mak konfirmadu pozitivu, ema ne’ebé mak kontaktu ho ema ne’ebé konfirmadu ona tenke halo provável.

“Ita aplika ona regra ema ida tenke kuartu ida, agora ami halo hela, tanba ne’e husu ba alin sira ne’ebé maka iha kuarentena, tenke hatudu disiplina duni. Kuandu sira maka la kumpre disiplina iha kuarentena maka sira rasik hakarak atu kontamina COVID-19”, nia akresenta.

Iha biban ne’e, Diretora ne’e husu ba jornalista sira atu kontribui informasaun ne’ebé loos, nune’e labele halo pániku ba públiku.

“Hau husu ba jornalista sira, kuandu hetan informasaun la ofisiál labele publika tanba buat sira ne’e bele halo ita-nia komunidade pániku. Informasaun ba COVID-19 nian sei sai husi Gabinete Sentru Jestaun Krize nian, ida ne’e maka ofisiál atu nune’e ita hotu kontribui hanenus pániku ba ita-nia komunidade”, apela atuál Portavós Sentru Integradu Jestaun Krize (CIGC, sigla portugés) ne’e.

Nia nota, durante ne’e komunidade barak maka hakarak hatene infomasaun, tanba ne’e labele fó informasaun ne’ebé maka seidauk ofisiál.

Nune’e mós, nia apela ba komunidade atu hakmatek iha uma tanba moras ne’e hahú mosu ona no tenke prevene propagasaun.

“Tanba ne’e maka ita hotu tenke koopera hodi prevene halibur ema liu na’in-lima”, nia salienta.

Odete mós hateten katak, ba sira ne’ebé maka iha sintoma moras COVID-19, ba teste negativu ne’e Ministériu Saúde sei tau ketak iha fatin ida, nune’e labele tau hamutuk no kahur ho sira ne’ebé seidauk halo teste, nune’e fásil atu kontrolu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here