Portavós CIGC, Odete Viegas. Imajen Tatoli/Egas Cristovão

DILI, 13 abríl 2020 (TATOLI) – Portavós Sentru Integradu Jestaun Krize (CIGC, sigla portugés), Odete Viages, informa kazu konfirmadu pozitivu na’in-haat ba COVID-19 iha Timor-Leste, konsidera hanesan kazu importadu tanba sira halo viajen maka hetan sintoma to’o konfirmadu pozitivu no la’ós hanesan transmisaun lokál.

Tanba ne’e, desizaun lockdown presiza konsidera bainhira iha ona transmisaun lokál.

“Kazu haat ne’e hanesan kazu importadu. Tanba sira mai husi viajen hotu. Maibé sé ema ruma mak ba vizita sira no hetan tan pozitivu, ne’e hanesan transmisaun lokál ona. Momentu ne’e mak ami hanoin lockdown lokál ne’e presiza konsidera”, dehan Portavós CIGC, liuhosi konferénsia infrensa, ne’ebé maka hala’o iha Sentru Mídia COVID-19, iha Salaun Sentru Konvensaun Dili (CCD, sigla portugés), segunda ne’e.

Maski nune’e, hahú segunda (13/04) Governu bandu ona kualkér sidadaun tama husi fronteira terrestre, ne’ebé antes ne’e fó limitasaun atu loke fronteira iha loron kuarta kada semana no ba oras rua de’it.

Enkuantu ba transporte aéreu, Governu suspende voo komersiál internasionál no halo ona akordu ho Airnorth atu halo operasaun iha semana ida dala tolu hodi transporta ekipamentu médiku no halo operasaun de’it iha kazu emerjénsia.

Tuir Odete Viegas, daudaun ne’e movimentasaun ema ne’ebé fila husi estranjeiru la’ós konsentra de’it iha Dili, maibé barak mós iha munisípiu.

“Ohin iha konfinamentu obrigatóriu ne’ebé kompleta ona loron 14 no sira barak mós ba munisípiu. Tanba ne’e lockdown karik iha ona transmisaun lokál”, nia akresenta.

Entretantu, kazu dahuluk COVID-19 iha Timor-Leste husi ema estranjeiru maibé daudaun pasiente ne’e rekupera ona no halo ona auto-kuarentena durante loron 40, ema ne’e mai husi diáspora.

Enkuantu, kazu konfirmadu foun tolu husi timor-oan ne’ebé tama husi fronteira terrestre husi Indonézia no desde deklara pozitivu, pasiente COVID-19 hirak ne’e iha ona fatin izolamentu iha Sentru Saúde Vera Cruz.

Jornalista: Natalino Costa

Editora: Julia Chatarina

2 KOMENTÁRIU

  1. Governo tenke hatene, labele Lockdown deit ba ami ne’ebe iha rai laran, lockdown ne’eba em sira nebe iha rai liur atu tama mai iha ita nia rai laran, tanba kazu konfirmadu ba moras covid-19 ne’e kazu inportadu husi rai liur mak mai, laos mosu iha rai laran.

  2. Hau sinti tarde liu..sei hein transmisaun lokal maka foin lockdown. Imajina..mezmu Bus nebe tula 25 pesoas nee nia kondutor no konjak nain rua too agora lemo-lemo rai iha komunidade hela…Pois wainhira hatun tiha 25 pesoas ne’e…Bus nee fila ba Maliana..keta halo tula fali ema ruma..nebe tur iha fatin..sira be positifu nia fatin…OMG..parese dadaun ne’e transmisaun lokal iha ona…Favor CIGC..trek hotu sira ne’e….LOCK DOWN ..kedas agora @@@

HAKEREK NO HATÁN

Please enter your comment!
Please enter your name here