Ema Na’in-124 iha kuarentena fatin lima rona esplikasaun husi Diretora Jerál Prestasaun Servisu Saude, Odete Viegas, molok re-integra filafali ba sosiedade. Seremónia ne’e realiza iha loron segunda (13/04), iha fatin kuarentena Otél Luz Clarita. Imajen Tatoli/Egas Cristovão

DILI, 13 abríl 2020 (TATOLI) – Governu liuhosi Ministeriu Saúde, hamutuk ho Sentru Integradu Jestaun Krize (CIGC, sigla portugés) iha segunda ne’e, re-integra tan ema na’in-124 ne’ebé kumpre ona konfinamentu obrigatóriu iha fatin kuarentena ne’ebé estabelese ona, durante loron 14 bá sosiedade, hafoin mai husi nasaun infetadu COVID-19.

Diretora Jerál Prestasaun Servisu Saude, Odete Viegas, hateten Governu halo tan re-integrasaun ba maluk sira iha kuarentena tanba kumpre ona konfinamentu obrigatóriu.

“Ohin ita halo tan re-integrasaun ba ita-nia maluk sira ne’ebé kumpre ona loron 14 ba auto-konfinamentu obrigatóriu hamutuk nain-124”, dehan Odete Viegas hafoin halo seremónia re-integrasaun iha kuarentena Otél Luz Clarita, segunda ne’e.

Nia adianta, sira ne’ebé ohin loron re-integra ona bá sosiedade, mai husi fatin kuarentena fatin lima hanesan Otél Viena, Otél Luz Clarita, Otél Fortuna, São João Paulo no Tibar, enkuantu maluk balun ne’ebé kuarentena iha Carla Mansion Guest House no Otél Fortuna seidauk bele sai tanba balun hatudu ona sintoma.

Maske nune’e, husi parte Governu husu nafatin ba sira ne’ebé re-integra ona bá sosiedade, atu kontinua kumpre regra sira ne’ebé estabelese ona hodi aplika, nune’e kontinua prevene-an husi Coronavírus.

“Ami nafatin husu ba alin sira ne’ebé maka sei fila ba sira nia fatin, atu kontinua nafatin halo distansia sosiál, no mós aplika regra uza máskara, no fase liman, hanesan ita bain-bain hatene tanba fase lima ne’e bele evita husi moras hotu-hotu no mós la presiza sai husi uma kuandu laiha nesesidade atu sai”, Odete akresenta.

Atuál Portavós CIGC ne’e mós apela ba maluk sira ne’ebé maka iha kuarentena, atu sira tenke desiplina no tuir regra no labele halibur malu iha kuarentena laran.

Iha sorin seluk, representante Ministériu Estatál Paulo da Silva, husu ba iha maluk sira ne’ebé maka foin sai husu kuarentena, bainhira hamutuk  ona ho família sira no tenke kontinua kumpre nafatin regulamentu husi Ministériu Saude.

Biban ne’e, nia husu mós, hafoin sai kuarentena tenke bá aprezenta-an iha postu administrativu  nune’e bele iha rekoñesimentu husi autoidade lokál sira no husu família sira labele tula direita bá sira-nia uma.

Paulo mós apela liután ba ema na’in-124, bainhira fila bá uma maka hetan sintoma ruma, tenke kontaktu iha liña telemóvel 119, nune’e pesoál saúde bele halo intervensaun lalais.

Iha seremónia re-integrasaun ne’ebé realiza iha Otél Luz Clarita ne’e, konklui ho fahe sertifikadu ba ema sira ne’ebé kumpre ona konfinamentu obrigatóriu durante loron 14.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here