Portavóz CIGC, Sergio Lobo. Imajen/TATOLI.

DILI, 12 abríl 2020 (TATOLI)-Portavóz Gabinete Sentru Integradu Jestaun Krize (SIJK), Sergio Lobo hateten, maski oras ne’e, Governu implementa hela estadu emerjénsia iha territóriu Timor-Leste hodi prevene transmisaun surtu COVID-19, maibé sei nafatin respeita direitu sidadaun nian tanba nasaun ne’e komunga estadu Diretu demokrátiku.

“Maneira ne’ebé mak governu uza nafatin respeita direitu sidadaun sira nian. Tanba ne’e laiha atuasaun fíziku hasoru kualker povu inklui joven sira ne’ebé kontinua la kumpre regra estadu emerjénsia,”dehan Eis Ministru Saúde, iha Sentru Konvensaun Dili, domingu (12/04/2020).

Maibé Portavóz ne’e afirma ida ne’e la taka dalan ba estadu liuhosi Polisia Nasionál Timor-Leste no FALINTIL-Forsa Defeza Timor-Leste atu halo atuasaun ba komunidade bainhira númeru kazu COVID-19 aumenta maka’as iha rai-laran no komunidade nafatin viola regulamentu ne’ebé implementa durante estadu emerjénsia.

Timor-Leste kontinua mantein ho kazu COVID-19 pozitivu na’in rua, maibé na’in ida rekupera ona tanba ne’e husu sidadaun sira atu kontribui nafatin ho Governu hodi prevene no kombate surtu pandemia globál ne’e.

“Estadu Emerjénsia mosu iha ita-nia ra’in tanba ita atu prevene malu husu surtu COVID-19 ne’e. La’ós estadu emerjensia joven sira kontinua halibur malu toka viola, hemu tua no tuur iha estrada to’o kalan bo’ot,”tenik tan.

Jornalista : Tomé Amado

Editór     : Agapito dos Santos

HAKEREK NO HATÁN

Please enter your comment!
Please enter your name here