Portavós CIGC, Odete Viegas. Imajen Tatoli/Egas Cristovão

DILI, 13 abríl 2020 (TATOLI) – Portavós Sentru Integradu Jestaun Krize (CIGC, sigla portugés), Odete Viegas, liuhosi Sala Situasaun informa, ekipa saúde sira sei foti amostra husi pasajeiru Bus Maliana ne’ebé halo ona viajen husi Batugade bá Dili iha loron 1 abríl, hamutuk ema na’in-tolu ne’ebé konfirmadu ona pozitivu COVID-19.

“Maluk sira ne’ebé iha munisípiu, liu-liu hamutuk iha Bus Maliana, aban iha ekipa tun iha terrenu atu hasai sira-nia amostra, maski sira seidauk iha sintoma maibé ita tenke hasai ona tanba ita hakarak atu limita númeru transmisaun”, dehan Portavós CIGC iha Sentru Mídia COVID, iha Sentru Konvensaun Dili (CCD, sigla portugés, segunda ne’

Nia haktuir, ema na’in-rua foun ne’ebé daudaun hetan pozitivu ne’e, tama ho grupu ida horiseik ema na’in-ida hetan pozitivu.

“Sira hamutuk ema na’in-ualu ne’ebé halo viajen husi Kupang mai Batugade no sira na’in-ualu iha travel ida. Entaun na’in-rua ne’ebé pozitivu ne’e inklui na’in-ualu ne’e. Husi Kupang to’o Batugade sira sa’e travel no husi Batugade bá Dili sira sa’e Bus Maliana. Iha Bus laran ne’e hamutuk ema na’in-25, la inklui kondutór no ajudante rua”, Odete Viegas adianta.

Notísia Relevante: CIGC Anúnsia Tan Kazu Pozitivu Foun Rua ba COVID-19

Nia esplika liután, haree ba situasaun hirak ne’e maka servisu ativu husi ekipa vijilánsia daudaun ne’e la’o hela.

“Ita hatene katak karik ema ne’e mak iha kontaktu ho sira ne’ebé pozitivu maka ita tenke foti kedan sira nia amostra”, nia akresenta.

Maski Timor-Leste rejista ona pasiente COVID-19 hamutuk na’in-haat no ida rekopera ona no dadaun kumpre hela auto-kuarentena durante loron 40, enkuantu na’in-tolu iha hela fatin izolamentu, maibé númeru negativu ka ema ne’ebé pasa ona laboratóriu teste maka aas liu kompara ho kazu pozitivu.

Tuir dadus atuál ne’ebé fó sai husi Ministériu Saúde iha loron segunda (13/04), kazu negativu hamutuk 111, pozitivu hamutuk haat, rekupera hamutuk ema na’in-ida, no hein rezultadu hamutuk 53, husi totál suspeitu na’in-168.

“Númeru negativu barak liu. Di’ak tanba maski ita iha difikuldade nia laran maibé númeru negativu sei boot nafatin husi númeru pozitivu”, nia subliña.

Jornalista: Natalino Costa

Editora: Julia Chatarina

1 KOMENTÁRIU

  1. Então kondutor ho ajudante mos kal daet duni tamba osan nebe selu passajerus Afetadu ba COVID 19,no diak tenke foti Sira hotu Nunee bele halo teste ba sira hotu seraque sira viajen mai iha dia 01/04/2020.
    Abraços

HAKEREK NO HATÁN

Please enter your comment!
Please enter your name here