Portavós CIGC, Odete da Silva Viegas. Imajen Tatoli/Egas Cristovão

DILI, 13 abríl 2020 (TATOLI) – Governu Timor-Leste liuhosi Portavós Sentru Integradu Jestaun Krize (CIGC, sigla portugés), Odete Viegas, iha Sala Situasaun, anúnsia tan kazu rua pozitivu ba COVID-19 ne’ebé mai husi kuarentena Otél Katuas.

Nune’e, totál kazu konfirmadu COVID-19 foun hamutuk tolu, konfirma hanesan pasiente ba COVID-19 na’in-haat, maibé hosi haat ne’e ida rekopera ona no daudaun hala’o hela auto-kuarentena durante loron 40.

“Kazu konfirmadu na’in-haat, pozitivu foun tolu. Loron hirak liubá iha kazu ida no orseik aumenta tan kazu foun rua. Portantu kazu foun hamutuk tolu no kazu ida mak rekuperadu. Tanba ida-ne’e mak ita dehan kazu konfirmadu hamutuk ema na’in-haat”, dehan Portavós CIGC iha Sentru Mídia COVID-19, iha Sentru Konvensaun Dili (CCD, sigla portugés), segunda ne’e.

Nia haktuir, ema na’in-rua ne’ebé daudaun konfirmadu pozitivu, tama ho grupu ida horiseik ema na’in-ida hetan pozitivu ne’e.

“Sira hamutuk ema na’in-ualu ne’ebé halo viajen husi Kupang mai Batugade no sira na’in-ualu iha travel ida. Entaun na’in-rua ne’ebé pozitivu ne’e inklui na’in-ualu ne’e. Husi Kupang to’o Batugade sira sa’e travel no husi Batugade ba Dili sira sa’e Bis Maliana, no iha Bis laran ne’e hamutuk ema na’in-25, la inklui kondutór no ajudante rua”, Odete Viegas adianta.

Atuál Diretora Jerál Prestasaun Servisu Saúde ne’e informa, ema na’in-rua pozitivu ne’e daudaun halo ona izolamentu iha Sentru Saúde Vera Cruz.

“Pasiente tolu ona maka iha Vera Cruz, maibé felizmente sira nia kondisaun di’ak. Isin manas laiha no mear mós komesa laiha ona. Signifika sira agora iha observasaun no iha médiku jerál na’in-rua maka haree inklui infermeiru sira, no mós espesialista ne’ebé dedikadu duni ba kazu ida ne’e”, nia subliña.

Nia refere liután, ba maluk ne’ebé mai hamutuk ho ema ne’ebé konfirmadu pozitivu ona no daudaun hela iha Otél Katuas, sira ne’e hasai ona teste.

“Ita halo hotu teste ba sira ne’ebé daudaun hela iha Otél Katuas no ita hein rezultadu orsida ka aban sei fó sai tan rezultadu. Aban lorokraik sei fó sai rezultadu”, nia dehan tan.

Tuir Portavós CIGC ne’e, normalmente ema sira ne’ebé iha kuarentena bainhira hatudu ona sintoma maka ekipa ambulánsia sei foti kedas no ba tau iha fatin izolamentu.

“Maibé la signifika katak nia tama ona izolamentu, nia tenke pozitivu. Tanba ema ne’ebé hela iha kuarentena kuandu nia iha ona sintoma maka husi laboratóriu mai hasai amostra, ambulánsia tenke halo kedan mudansa ba fatin izolamentu hodi hein rezultadu. Bainhira nia pozitivu ita kontinua, sei negativu ita prepara atu hasai fali sira mai iha fatin kuarentena”, nia informa tan.

Tuir Odete Viegas, sira ne’ebé negativu sei tau iha fatin kuarentena ketak no la hamutuk ho ema na’ebé seidauk hasai teste.

“Daudaun ne’e ekipa vijilánsia no ambulánsia organiza hela hamutuk ho Ministru Turizmu, Komérsiu no Industria, atu buka otél sira ne’ebé maluk sira kumpre ona kuarentena loron 14, ita uza fali fatin hirak ne’e atu tau maluk sira ne’ebé negativu”, nia dehan tan.

Tuir dadus ne’ebé CIGC fó sai, haktuir númeru suspeitu ne’ebé ekipa hasai teste hamutuk 168.

Hosi númeru ne’e, ema na’in-111 hatudu rezultadu negativu, enkuantu na’in-53 mak sei hein ninian rezultadu.

Dadus seluk, husi munisípiu Dili mak ema na’in-524 maka daudaun iha kuarentena obrigatóriu, auto-kuarentena na’in-ida, enkuantu kumpre ona konfinamentu obrigatóriu durante loron 14 hamutuk na’in-1.051.

Entretantu, husi munisípiu ema-na’in-113 mak hela iha kuarentena obrigatóriu, auto-kuarentena na’in-neen no pasa ona loron 14 hamutuk 210.

Jornalista: Natalino Costa

Editora: Julia Chatarina

3 KOMENTÁRIU

  1. Ohin husi belun Jornalista sira husu klarifikasaun kona ba BIS maliana nee aluga husi MdS ka BIS nebee halo operasaun hanesan babain tula pasajeirus lokal sira mak sira nain 8 nee sae tan ba?

  2. diak liu bis konditor ho konjak husi bis refere ho ema sira sa’e iha laran ne’ebe presizaa ba cekup hotu tanba moras ne’e ita la bele hatene los keta halo sira ne’e mos balu kona karik bele daet mos ba ema seluk.

HAKEREK NO HATÁN

Please enter your comment!
Please enter your name here