Komandante PNTL Munisípiu Dili, Superintendente Xefe Armando Monteiro. Imajen/Egas Cristovão

DILI, 13 abríl 2020 (TATOLI) – Komandante Polísia Nasionál Timor-Leste (PNTL) Munisípiu Dili, Superintendente Xefe Armando Monteiro, husu ba autoridade lokál atu labele halibur populasaun iha ámbitu estadu emerjénsia.

Notísia Relevante :  Autoridade Lokál Munisípiu Dili Hahú Halo Rejistu ba Komunidade

Iha loron hirak ikus ne’e, Xefe Aldeia no Xefe Suku balun iha Dili-laran komesa halibur komunidade atu halo rejistu família atu asesu ba subsídiu $100 ne’ebé sei iha diskusaun Konsellu Ministru.

Ba jornalista, ohin, iha Otél Luz Clarita, Dili, Superintendente Xefe Armando Monteiro, informa, nia-parte lidera diretamente operasaun tuun ba Sede Suku Comoro, hodi halo apelu atu la bele halibur malu hodi hein orientasaun hosi Ministériu Administrasaun Estatál (MAE).

“Ami nia misaun mak oinsá atu labele halo atividade konsentrasaun iha fatin-fatin tuir orientasaun iha estadu emerjénsia. Nune’e, evita propagasaun surtu Coronavirus ka COVID-19,” hateten Armando Monteiro.

Nia husu ba autoridade lokál-sira kumprimenta Lei estadu emerjénsia no rona loloos lai informasaun hosi Governu mak  bele hasai avizu hodi husu komunidade rejista uma-kain.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here