Ministru Negósiu Estrajeiru no Kooperasaun, Dionísio da Costa Babo Soares. Imajen Tatoli/Egas Cristovão

DILI, 13 abríl 2020 (TATOLI) – Ministru Negósiu Estrajeiru no Kooperasaun, Dionísio da Costa Babo Soares, hamutuk ho ekipa Sentru Integradu Jestaun Krize (CIGC, sigla portugés), halo telekonferénsia ho Embaixadór rezidente sira, Organizasaun Internasionál inklui reprezentante Organizasaun Nasaun Unida (ONU), hodi atualiza situasaun COVID-19 iha Timor-Leste.

Telekonferénsia ne’ebé hala’o iha Gabinete Jestaun Krize iha Sentru Konvensaun Dili (CCD, sigla portugés) ne’e, hodi estabelese koordenasaun servisu ba COVID-19.

“Ida ne’e telekonferénsia hamutuk ho Embaixadór rezidente sira ba dahuluk ne’ebé maka ita halo, liuliu organizasaun internasionál sira ho Nasaun Unida hodi koordena servisu hamutuk husi Sentru Integradu Jestaun Krize, hodi haree dezenvolvimentu propagasaun COVID-19 ne’e iha ita-nia rai”, dehan Dionísio, segunda ne’e.

Nia haktuir, telekonferénsia ne’e la’o di’ak tebes tanba Embaixadór hotu akompaña situasaun surtu COVID-19 iha rai-laran.

Ministru ne’e adianta, katak CIGC hamutuk ho Ministériu Negósiu Estranjeiru no Kooperasaun (MNEK) tenta informa no hateten loloos situasaun reál iha rai-laran, liuliu kona-ba númeru sira ne’ebé maka iha kuarentena, sira ne’ebé maka sai tiha ona husi kuarentena no númeru sira ne’ebé maka provável.

Tuir governante ne’e, CIGC no MNEK sei kobabora hamutuk ba oin, hodi haree timor-ona sira iha estranjeiru ne’ebé hatudu ona sintoma COVID-19, inklui tau-matan mós ba sidadaun balun ne’ebé tama liu dalan ilegál.

“Graças a Deus, ita-nia komunidade sira mós halo ona vijilánsia maka’as hodi haree atu labele ema tama arbiru. Tama tiha mai maka subar tiha no la hateten buat ida, maka bele halo propagasaun surtu COVID-19 iha rai-laran”, dehan Ministru Dionísio.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here