Embaixadór Timor-Leste ba Indonésia, Alberto X.P. Carlos. Imajen/Francisco Simões

DILI, 12 abríl 2020 (TATOLI) –Embaixada Timor-Leste ba Repúblika Indonézia (RI) iha Jakarta, ohin, hasai tan karta avizu ida ba Timoroan hotu ne’ebé reside iha territóriu Repúblika Indonézia, atu hakmatek ka hela metin nafatin iha ida-idak nia hela fatin iha territóriu RI no prevene halo movimentasaun deznesesáriu, inklui viajen mai Timor-Leste.

Notísia Relevante : Relasiona ho Coronavirus, Embaixada TL iha Jakarta Alerta ba Timoroan Labele Pániku

Karta Avizu Embaixada TL ba RI ba Timoroan ne’ebé reside iha territóriu RI.

Embaixada TL iha Jakarta fó hatene  ba Timoroan hotu ne’ebé reside iha territóriu Indonézia nia-laran katak, liuhosi despaixu No.19/GABMI/IV/2020, Governu Timor-Leste deside ona atu la fó dalan ba Timoroan nune’e mós estranjeiru atu tama mai territóriu nasionál. Despaixu ne’e hahú aplika husi oras 00:00, loron 13 abríl 2020 ba oin.

Bazeia ba ida ne’e, Embaixada TL iha Jakarta hakarak husu ba sidadaun sira atu:

  1. Hela metin nafatin iha ida-idak nia hela fatin iha territóriu Indonézia nia laran.
  2. Prevene halo movimentasaun deznesesáriu, inklui viajen ba Timor-Leste.
  3. Kontinua tau atensaun maxima nafatin ba medida preventiva sira ne’ebé prevalese ona iha Indonézia, liuliu ba desizaun ikus hodi implementa PSBB (Pembatasan Sosial Berskala Besar).
  4. Kontinua mantein kontaktu no komunikasaun ho embaixada liuhosi meius komunikasaun ne’ebé sirkuladu ona iha avizu-sira antes ida-ne’e.

Liuhosi karta avizu ida ne’e, Embaixada TL iha Jakarta fó hanoin mós katak, konsidera aprovasaun Konsellu Ministru   atu atribui subsídiu ba Timoroan ne’ebé reside iha ema-nia rain, inklui Repúblika Indonézia, estudante, bolseiru ka la’ós  bolseiru,  embaixada kontinua fó hanoin atu:

  1. Prienxe formuláriu “Inskrisaun Konsulár” faze primeiru ne’ebé distribui ona ba ida-idak.
  2. Kompleta mós rejistu online nu’udar faze segundu hosi prosesu ida ne’e, hodi hein faze sira seluk tuir mai.
  3. Embaixada sei aviza fali kona-ba kontinuasaun hosi prosesu ida ne’e iha tempu ikus.

Liuhosi karta ne’e Embaixada TL iha Jakarta mós aprofunda katak embaixada kontinua observa no monitoriza hodi fó update ba Timoroan hotu kona-ba evolusaun hosi propagasaun Coronavirus ka COVID-19 iha Repúblika Indonézia.

“Hela ho Maromak, mantein moris saudavel no boas festa Santa Páskua,” lia menon ikus hosi karta avizu embaixada nian nee.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here