Arsebispu ba Arkedioseze Metropolitana Dili, Mgr. Virgílio do Carmo da Silva, SDB, fó komiñaun ba sarani ida iha Igreja Katedrál, Vila-Verde, Dili. Imajen/Egas Cristovão

DILI, 12 abríl 2020 (TATOLI) – Selebrasaun páskua  ba Jesus Nia mate no moris-hi’as atu revitaliza ka hafoun fila-fali Sarani Kristaun ida-idak nia-an hodi hadook hosi sala-sira no oinsá atu moris nakloke ba Maromak  Nia-reinu ho domin, pas no fraternidade.

Lia-hirak ne’e hato’o hosi Arsebispu Arkidioseze Metropolitana Dili, Mgr. Virgílio do Carmo da Silva, SDB, iha nia omilia bainhira prezide serimónia misa  Domingu-Resurreisaun, ohin, iha Igreja Katedrál Dili, Vila-Verde.

Misa Domingu-Resurreisaun ba tinan ne’e la hanesan ho selebrasaun tinan-sira liu ba, basá tinan ne’e, la hetan partisipasaun direta hosi sarani-sira iha Igreja laran, maibé ida-idak partisipa misa iha uma liuhosi kanál televizaun no rádiu  hodi kumpre ba orden hosi estadu emerjénsia ba prevensaun surtu Coronavirus ka COVID-19 ne’ebé sai hanesan inimigu invizivel ba mundu ohin loron.

“Selebrasaun festa Páskua wain ida Kristu ita-nia paixaun, ita-nia páskua saran-an ba mate, Nia bibi-oan Maromak be kasu sala rai klaran hodi hasa’e-an, Ninia haklaken mate hodi Ninia moris-hi’as, hafoun-hi’as moris, ida ne’e mak razaun ita-nia ksolok dadeer ida ne’e nian.  Tanba ne’e, loron ida-ne’e loron ne’ebé Santu liu loron hotu-hotu,” Don Virgílio fó sasin.

Don Virgílio afirma tan, loron ida-ne’e Maromak fó tulun mai ho haksolok loron páskua Maksoin Ninian.

“Ema lori tiha ona Nai hosi rate. Dadersán nakukun de’it, Maria Magdalena halai ba rate ida ne’e hatudu duni nia intimidade katak nia besik tebe-tebes ho Jesus, basá Jesus mak fó fali ba nia sentidu moris nian, tan ne’e, nia dehan, se laiha Jesus ha’u nia moris, ha’u lakon tiha sentidu vida ida ne’e, nune’e mós ita la tama iha relasaun ida íntimu ho Maromak, ita-nia relasaun sira sei hela iha kulit de’it,” Don Virgílio dehan tenik.

Don Virgílio fó sasin tan, Maria Magdalena la’ós admira de’it kona-ba Jesus, maibé nia esperiénsia intimidade ida ne’e iha nia-moris, tan ne’e, nia la hakmatek, maibé hakarak sente ida iha nia laran dezeju boot ida atu hela nafatin ho Jesus. Tanba ne’e,  Jesus nia-mate auzénsia boot ida ba Maria Magdalena no nia obriga nia-an dadeer nakukun atu ba rate.

“Saida mak Maria  hetan buat ne’ebé nia haree ba rai ba nia-an maibé nia lalais fó hatene ba eskolante sira, ho nune’e Pedro no eskolante sira ne’ebé Jesus hadomi hamriik ba kedas rate. Saida mak eskolante-sira ne’e haree uainhira hateke ba rate laran sira buka isin mate Jesus nian, nune’e haree sinál sira mate ninian namkari hela iha rate laran. Maibé eskolante ne’ebé Jesus nia hadomi nia hateke ba rate nia mós haree rate ne’ebé mamuk iha sinál moris nian no fiar katak tuir eskritura Jesus sei moris-hi’as duni hosi mate.”

Arsebispu Metropolitana Dili, Don Virgílio do Carmo da Silva, SDB, hateten, páskua no surpreza boot Nain Maromak Nian ba sarani-sira hodi ko’alia kona-ba prezensa no auzénsia Jesus nian iha eskolante sira nia-moris hanesan apelu ida ba transformasaun espetakulár ida.

Nia dehan, hanesan iha Amu Papa iha nia karta ezortasaun apostólika Kristu deskreve katak, “Kristu moris, ita nia esperansa no Nia mak juventude furak liu mundu ne’e nian, buat hotu ne’ebé Nia kona sai joven revitaliza ou sai foun nakonu ho moris.”

Amu Bispu Don Virgílio hakarak hato’o ba sarani ida-idak katak, “Kristu moris no hakarak o mós moris. Nia iha o, Nia hamutuk ho o, Nia nunka husik mesak maske o hadook-an to’o iha ne’ebé de’it, ida ne’ebé moris-hi’as ona hela iha ne’ebá bolu no hein o atu fila ba Nia no hahú fali dala-ida tan bainhira o sente-an katuas ka ferik tanba laran susar hirus ka ta’uk, laran nakdedar ka frakasu, Nia iha ne’ebá atu fó fali kbiit no esperansa.”

Don Virgílio tenik tan, Jesus Nia moris-hi’as ne’e mak prinsípiu moris foun ba hotu; feto no mane, katuas eh labarik, matenek eh la’e. Basá, renovasaun ne’ebé loloos nian hahú sempre hosi ema nia fuan no konsiénsia.

“Páskua mós inísiu mundu foun nian, haketak ema atan hosi sala nian no mate, atu ema bele nakloke ba Maromak Nia-reinu domin, pás no fraternidade,” afirma  Don Virgílio.

Tuir observasaun Ajénsia Tatoli nian iha selebrasaun misa Domingu-Resurreisaun ne’e iha de’it Bispu ho padre balun, akólitu no koru.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here