Fronteira terrestre Mota-ain, Batugade, Imajen Tatoli/António Gonçalves

DILI, 12 abríl 2020 (TATOLI) – Governu liuhosi Ministériu Interiór hasai ona despaisu númeru 19/GAPMI/BI/2020, ne’ebé bandu kualkér sidadaun, tantu timor-oan no estranjeiru atu tama iha territóriu nasionál.

Medida ne’e tanba Governu konsidera deklarasaun Estadu Emerjénsia durante loron 30 ne’ebé implementa iha territóriu nasionál hotu, hanesan fundamentu atu halo verifikasaun situasaun kalamidade públika no nesesidade husi medida iha ámbitu sirkulasaun internasionál husi ema no merkadoria.

“Hahú tuku 00:00, segunda (13/04), proibidu ba kualkér sidadaun atu tama ba territóriu nasionál”, refere nota husi Ministériu Interiór, ne’ebé Agência Tatoli asesu iha domingu ne’e.

Nune’e, husi diploma konjuntu, ne’ebé aprovadu husi Ministériu Interiór (MI) no Ministériu Negósiu Estranjeiru no Kooperasaun (MNEK), ne’ebé estabelese medida redusaun oráriu funsionamentu postu fronteira terrestre no definisaun rekezitu tama no sai, nu’udar karakter esepsionál no temporáriu.

Notísia Relevante: Semana Oin, Fronteira Terrestre Loke De’it Iha Loron Kuarta

Despaisu ne’e, ho baze artigu 30 Dekretu Governu númeru 3/2020, 28 marsu ne’ebé altera ho Dekretu númeru 6/2020, 8 abríl.

“Despaisu ne’e la inklui funsionáriu husi kualkér nasionalidade ne’ebé presta atividade profisionál iha plataforma petrolífera ne’ebé lokaliza iha Tasi Timór ka atividade ne’ebé hetan ona autorizasaun husi Primeiru-Ministru”, refere nota ne’e.

Nune’e mós, despaisu ne’e la inklui tránzitu merkadoria ne’ebé transporta nesesidade bázika.

Despaisu ne’ebé sai iha loron sesta (10/04) ne’e, sei iha efeitu iha tuku 00:00, segunda (13/04) to’o tuku 23:59, 26 abríl 2020, maibé sei bele estende bainhira iha evolusaun situasaun surtu COVID-19.

Antes ne’e, ho baze diploma konjuntu husi MI no MNEK, Ministru Ministru Interiór interinu, Filomeno da Paixão de Jesus, informa katak nia parte hatún ona diretiva ba Polísia Nasionál Timor-Leste (PNTL) ho baze ba Dekretu Governu atu halo desaminasaun iha Fronteira Terrestre atu hahú semana oin, segunda (06/04) bele loke de’it iha loron kuarta.

“Fronteira Terrestre ne’e hahú semana oin, kada semana loke dala-ida iha de’it, iha loron kuarta no oras rua de’it. Ne’ebé ohin no aban ne’e sei loke atu sira tama tanba ne’e PNTL tenke halo ezaminasaun, maski sira simu tiha ona orden,” tenik Ministru Filomeno iha Palásiu Governu, hafoin enkontru ho Primeiru-Ministru, Taur Matan Ruak, sesta (03/04).

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here