Abitante na'in 30 iha kuarentena Hotel Farol atu re-integra hikas ba sira-nia komunidade. Imajen Tatoli/Osória Marques.

DILI, 12 abril 2020 (TATOLI)–Governu liuhosi Sentru Integradu Jestaun Krize re-intregra tan abitante 116 ne’ebe mak kumpre ona kuarentena durante loron 14 ba iha sira-nia família ka sira-nia komunidade.

Diretòr Nasionàl Planeamentu Kooperasaun Ministériu Saùde, Narcisio Fernandes informa, abitante timoroan sira ne’e mai hosi nasaun afetadu surtu COVID-19 hanesan Indonézia ne’ebé hala’o kuarentena iha Hotel Farol, Hotel The City, Hotel Colmera no Hotel Novo Orizonte.

“Ohin, loron 12 abril 2020, la’ós ita-boot sira iha kuarentena Hotel Farol de’it maibé sira husi kuarentena haat mak hosi Hotel Farol ema na’in 30, Hotel Colmera na’in 27, Hotel The City iha na’in 30 no Hotel Novo Orizonte ba segunda etapa iha ema na’in 29, nune’e hamutuk 116 abitante mak kumpri ona regra iha kuarentena,” dehan Diretòr Nasionàl Planeamentu Kooperasaun Ministériu Saùde, Narcisio Fernandes, ba jornalista sira iha otél Farol, Dili, domingu ne’e.

Tanba ne’e, nia fó mensajen ba abitante 116 atu kontinua disiplina halo prevensaun ijiéne, fase liman depois sai hosi kuarentena tanba risku bele akontese bainhira laiha dixiplina ba prevensaun.

“Ita mantén distánsia dixiplina hosi komunidade tantu família no seluk mak tenke taka ibun bainhira mear ho fani. Tanba sira kumpre kuarentena loron 14 hatudu duni sira-nia kontribuisaun ba prevensaun COVID-19 ba sira-nia an, família no ba komunidade sira,” nia dehan.

Nia hatutan, abitante hirak ne’ebé reintegra ona ba sira-nia komunidade ne’e barak liu mak mai hosi Dili hamutuk abitante na’in 83.

Entretantu, Koordenadòr Sentru Integradu Jestaun Krize Kuarentena, Aurelio Guterres hateten, surtu iha nivel global no Timor-Leste mós enfrenta no partisipa kombate Coronavirus (COVID-19) ida ne’e.

Nune’e, nia hateten, abitante sira ne’ebé ohin atu sai hosi fatin kuarentena ne’e mós sai hanesan matadalan ida hodi hatutan, liuliu mak ema hotu hamutuk mak bele kombate no prevene COVID-19 ba família, kolega no sosiedade tomak.

Entretantu, Erzinha Ernista Edita hateten, sira hela iha kuarentena sente hanesan iha sira-nia uma rasik no laiha presaun ruma hosi pesoál saùde ka seguransa no sente hanesan baibain de’it.

“Ami hela iha kuarentena ne’e sente baibain iha ita-nia uma no ita hela kuarentena atu prevene moras COVID-19 no kumpre regra Estadu Emerjénsia. Durante loron 14 sente saudavel no hetan tratamentu di’ak no másimu hosi pesoál saùde ne’ebé responsável ba kuarentena ne’e,” nia hateten.

Nia hatutan, maske sai ona hosi kuarentena maibé sira sei kumpre nafatin regra Estadu Emerjénsia durante hela iha sira-nia uma nune’e labele fó risku ba família no komunidade sira.

“Maske ami sai hosi kuarentena ona maibé ami kumpre nafatin regra Estadu Emerjénsia nian iha uma no iha komunidade nia leet. Ha’u apela mós ba maluk sira hotu ne’ebé kumpre kuarentena loron 14 katak mantén nafatin regra distánsia sosiál atu nune’e saudavél nafatin,” nia dehan.

Entretantu, Médiku Koordenadòr ba Kuarentena Hotel Farol, Andreas Roy hateten, abitante sira ne’ebé iha kuarentena hamutuk 30 kompostu hosi Dili ema na’in 19, Ainaro ema na’in 1 (ida), Manatuto na’in rua (2), Baucau na’in rua (2), Lospalos na’in 1 (ida), Same na’in haat (4) no Liquica ema na’in ida (1).

Notísia Relevante: Xanana: “Sai Hosi Kuarentena, Tenke Sai Ezemplu Ba Sosiedade”

Jornalista :  Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here