Portavóz CIGC, Sergio Lobo. Imajen/TATOLI.

DILI, 12 abríl 2020 (TATOLI)–Portavóz Sala Situasaun Sentru Integradu Jestaun Krize (CIGC, sigla Portugés), Sergio Lobo, ohin informa CIGC atualiza evolusaun esforsu tomak iha prevensaun no mitigasaun ba moras COVID-19, katak ema ne’ebé mak halo konfinamentu obrigatóriu hamutuk 764.

“Ami informa ba públiku katak to’o ohin tuku 12:00, loron 12 abril 2020, maluk sira ne’ebé mak sei iha konfinamentu obrigatóriu ka hela iha kuarentena hamutuk na’in 764 husi na’in 1140, tanba abitante na’in 119 mak fila ona ba uma”, informa Portavóz Sergio Lobo, ba jornalista sira iha Konferénsia Imprensa iha Sentru Konvensaun Dili (CCD-sigla portugés), domingu ne’e.

Tuir nia, komulativamente dadus hosi loron 06 marsu–12 abríl 2020, suspeitu hamutuk 116 kompara ho númeru horisehik nian hamutuk 64, entaun ohin aumenta tan 52.

“Husi teste laboratóriu ba suspeitu 116 ne’e, hanesan ita hatene na’in rua pozitivu. Ida mak sei halo tratamentu, maibé nia kondisaun estavel no ida seluk tuir teste dala rua ona ho rezultadu negativu hotu, entaun fila tiha ona ba nia uma. Mezmu iha nia uma, nia nafatin halo kuarentena iha nia uma durante loron 14,” nia dehan.

Ministrériu Saúde, nia hateten liuhosi ekipa vizilánsia termolojika kontinua halo akompañamentu no halo monitorizasaun ba ema ne’e nia kondisaun, nune’e bainhira iha sintoma ruma bele toma atensaun ho rápida.

“Husi ema na’in 114, na’in 52 mak negativu no na’in 62 sei hein rezultadu no iha tempu badak sei fó sai rezultadu. Tanba ne’e ita-nia kazu mak rua, maibé kazu rua ne’e importadu katak mai husi rai liur. Signifika iha rai-laran seidauk iha transmisaun lokál,” nia dehan.

Tuir dadus, ema ne’ebé mak tama husi rai liur mai komesa menus ba daudaun ona, tanba ne’e mak ema ne’ebé agora iha kuarentena menus ona husi sira ne’ebé mak sai, tanba Governu foti ona medida atu suuspende timoroan sira hosi fronteira terrestre.

“Ida ne’e akontese tanba Governu foti ona medida atu suspende timoroan sira husi fronteira terrestre no medida ida ne’e fó espasu di’ak ba instituisaun Estadu sira hotu ne’ebé serbisu iha koordenasaun Integradu Jestaun Krize nian atu bele konsentra di’ak liutan no esforsu haree kuarentena ho di’ak,” nia hateten.

Nia esplika, Governu mós esforsu atu oinsá identifika kazu potensiálmente bele mosu, hodi nune’e halo teste ba sira no halo izolamentu ba ema sira ne’ebé mak presiza halo izolamentu. Primeiru, fó atendementu di’ak liu ba sira no segundu importante liután mak atu evita moras labele hada’et ba ema seluk.

Notísia Relevante: Governu Re-Integra Abitante 116 iha Kuarentena Ba Komunidade

Jornalista : Osoria Marques

Editór      : Cancio Ximenes

HAKEREK NO HATÁN

Please enter your comment!
Please enter your name here