Tanki bee ne'ebé monta iha fatin públiku hodi ajuda komunidade fase liman, hodi kombate Covid-29. Imajen UNICEF

DILI,  12 abril  2020 (TATOLI)–Xefe Ekipa Task Force Servisu Água no  Saneamentu (SAS) iha Estadu Emerjénsia no Kombate COVID-19, Francisco  Afonso hateten, parte SAS mós iha planu atu monta tan profil ba iha fatin públiku sira hanesan kantina, kuarentena no fatin  ba seguransa nian atu nune’e sira ne’ebé tama-sai bele fase liman beibeik.

“SAS Iha ona planu, parese aban ba oin, ami komesa monta tan profil hamutuk 30 resin hanesan ne’e iha kuarentena Dili tanba profil ne’ebé ami monta ona seidauk sufisiente ba ita-nia komunidade sira liuliu seguransa ne’ebé halo seguransa no maluk sira ne’ebé tama-sai hosi fatin públiku. Kuarentena foin ida mak ami monta mak Vila Verde,” dehan Xefe Ekipa Task Force, Francisco  Afonso, ba Ajénsia TATOLI liuhosi entrevista via telefone, domingu ne’e.

Nia hatutan, kuarentena ne’ebé estabelese iha Dili ne’e maioria mak seidauk tau profil enatun aban sei monta aumenta hodi ema hotu-hotu liu ba mai hanesan seguransa no Pesoal Saùde sira bele fase liman.

“Ita hatene katak ita-nia Governu liuhusi Sentru Integradu Jestaun Krize nian estabelese kuarentena iha Dili barak, nune’e ami hanoin atu monta tan tanba  profil 16 ne’ebé ami monta seidauk nesesita abitante iha kuarentena,” nia hatutan.

Xefe ekipa ne’e dehan, profil ne’ebé Organizasaun  Plan Internationál monta iha semana ne’e mak hamutuk tolu (3), ida mak tau kuarentena Vila Verde, Taibese no seluk mak iha Tribunal nian.

Durante Estadu dekreta Estadu Emerjénsia ba covid-19 nian, nia haktuir, dirasaun SAS hamutuk ho United Nations International Children Fund (UNICEF) no Organizasaun Plan Intenasionál monta ona profil hamutuk 16.

“Ami hamutuk ho UNICEF no Plan Intenasionál monta ona profil hamutuk  16. SAS ho UNICEF hamutuk 13 no ho Plan hamutuk 3 ne’ebé mak  atu fasilita ita-nia komunidade no seguransa sira nune’e labele hada’et moras ba nia an no ba ema seluk,” nia esplika.

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here