Arsebispu ba Arkedioseze Metropolitana Dili, Don Virgílio do Carmo da Silva. Imajen Tatoli/Egas Cristovão

DILI, 11 abríl 2020 (TATOLI)-Arcsebispu Arquidiocese Metropolitana Dili, Virgílio do Carmo da Silva SDB, apela ba lider nasaun nian atu husik interese pesoál, grupu, no partidaria hodi servisu hamutuk ba kombate surtu Coronavirus ka COVID-19 iha Timor-Leste.

Dom Virgílio do Carmo da Silva hato’o apela ne’e durante prezide misa domingu resurisaun iha igreja Katedrál Dili, ohin.

”Paskua ho pandemia ba ita Timoroan sira liu-liu ho Jesus nia moris hias konvida ita hotu atu husik ita-nia interese pesoál, interese grupu, interese partidaria hodi fó liman ba malu hari unidade hodi kombate virus ida ne’e nu’udar inimigu invizivel,”dehan, Lider Igreja Katolika Dioseze Dili, ohin.

COVID-19 mosu halo Timoran hotu-hotu pániku maibé Bispu Dom Virgílio do Carmo da Silva enkoraza ba ema hotu-hotu atu moris iha situasaun hakmatek hodi prevene an hosi moras globál ne’e.

“Tempu ida agora la’ós atu halo ita sai pániku maibé buka atu hakmatek, mensajen Jesus moris hias nian mai ita iha momentu ne’e mak páz hodi saran ita-nia moris ba Liurai Feto dame na’in, saran ba nia liman povu ida ne’e husi buat aat hotu,” nia hatutan.

Ulun boot Igreja Katólika Dioseze Dili ne’e hateten Timoroan hamutuk maka iha forsa atu reziste hasoru pandemia globál Corona Virus Diases 2019 iha Timor-Leste.

“Timoroan kuandu hakarak iha unidade atu kombate virus ida ne’e, dalan ida de’it mak tenki iha páz,”tenik tan.

Jornalista : Tomé Amado

Editór     : Agapito dos Santos

HAKEREK NO HATÁN

Please enter your comment!
Please enter your name here