Koordenadór Ekipa Gabinete Intergado Jestaun Krize ba Asuntu Saúde, Dr. Rui Maria de Araujo. Imajen/Egas Cristovão

DILI, 11 abríl 2020 (TATOLI)–Portavóz Sentru Integradu Jestaun Krize, Rui Maria de Araújo, preokupa ho abitante kuarentena obrigatóriu ne’ebé halibur malu, halo konsertu, konta istória, maibé fatin ne’e atu halo observasaun ba prevensaun surtu COVID-19.

“Kuarentena sei sai fatin risku mós ba transmisaun. Se la kuidadu no la dixiplina ne’e susar,” dehan Rui Maria de Araújo, durante konferénsia imprensa iha Sentru Konvensaun Dili (CCD-sigla Portugés), sábadu (11/04/2020).

Notísia Relevante:Governu Preokupa ho Konsentrasaun Ema Barak

Hodi apela ba okupante sira iha kuarentena idak-idak atu mantein kalma, proibidu tuur hamutuk, hemu hamutuk para bele prevene transmisaun surtu coronavirus husi ema ida ba ema seluk.

“Pesoál sira iha kuarentena atu mantein kalma no labele pasa informasaun oin-oin ba públiku hodi kria pániku iha sosiedade tanba pesoál saúde no médiku sira akompaña nafatin no halo observasaun regularmente,” apela Doutór timoroan ne’e.

Nune’e, nia husu mós ba sidadaun  ne’ebé nia oan ka família hela iha  kuarentena atu fó konfiansa ba médiku no pesoál saúde hodi atende sira bainhira mosu kazu sira iha ligasaun ho COVID-19.

Aleinde ne’e, apela ba populasaun iha Timor laran tomak atu mantein hakmatek iha idak-idak nia-uma no evita halo movimentu tanba risku atu hetan surtu coronavirus.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here