Artista Muzika Timoroan, Ego Lemos. Imajen Espesiál.

Múzika nu’udar dalen mundu nian, nia la presiza atu tradús, iha múzika laran ko’alia hosi klamar ba klamar (Erwin Edman, Filozofu America).

DILI, 11 abril 2020 (TATOLI)—Artista múzika timoroan sira apresia no interpreta filozofu America, Erwin Edman, nia hanoin ne’e katak múzika nu’udar dalen mundu nian ne’ebé la presiza tradús tanba iha múzika ida-nia laran artisita múzika sira sei ko’alia no hananu hosi klamar ba klamar.

Artista múzika ida mak hananu múzika ida lahó nia klamar tomak, nia lori múzika ne’e hanesan sente klamar laek no la fó klamar ba múzika refere atu moris ba nafatin.

Iha propagasaun COVID-19 ne’ebé hahú invade Timor-Leste, artista múzika timoroan sira homan liman ba malu hodi kontra hasoru surtu COVID-19 ho múzika “Mai Fali Eh”. Artista múzika timoroan sira halibur malu hamutuk, hananu ho ida-idak nia style (jeitu) sai nu’udar lian-menon ba timoroan hotu atu hela hakmatek iha ida-idak nia uma.

“Hela Iha Uma, Hakmatek Iha Uma,” dehan artista timoroan sira liuhosi lian-menon hodi hamaluk no hakbiit timoroan sira hodi luta satan hasoru surtu COVID-19, tanba daudaun ne’e iha Timor-Leste timoroan balu hetan kazu pozitivu ona.

Inisiativa bolu artista múzika timoroan sira iha rai-laran no rai-liur hodi hananu hamutuk múzika “Mai Fali Eh” ne’e, mai hosi Grupu MULTIMEDIA BOLU MALU GROUP hodi lori “Hananu hosi Uma”. Tansá? Ho razaun ida de’it mak atu lolo-lian ba malu, hatutan-lian ba malu hodi fahe ba timoroan sira atu rona múzika ida ne’e hodi “Hakmatek iha Uma”.

“Reuni artista sira iha biban ne’e, katak situasaun atu la haketak ema. Maski difisil atu hasoru malu maibé ita sei bele kria buat ruma ho talentu ne’ebé mak ita iha husi do’ok. De faktu, entretenimmentu importante iha tempu ida ne’e. Ita bolu malu, hamaluk no hakbi’it malu “a partir de casa”. Grupu konsidera hananu ne’e iha sentidu bolu ita fila ba uma, tanba iha uma mak iha mahon no domin. Mensajen mak ita-nia uma nakonu ho domin. Hili muzika “Mai Fali Eh” nia sentidu bo’ot tebes kona-ba domin iha uma,” dehan guitarista, Danny, hosi Grupu Múzika “Klamar”.

Muzika “Mai Fali Eh” ne’e memoravel ba jerasaun tuan sira hosi tinan 1960-1970 nian maibé mós la lakon le’et iha jerasaun foun sira. Múzika “Mai Fali Eh” familiar ona ho timoroan sira no timoroan sira sempre kanta hodi haksolok-an no haksolok malu.

Artista Muzika Timoroan, Dalia Kiakilir Imajen Espesiál.

Artista múzika timoroan sira bolu malu hananu hikas múzika
Mai Fali Eh” ne’e pertinente tebes. Tanba, iha altura ida hanesan ne’e, iha situasaun timoroan sira tau kbiit hamutuk hodi kontra COVID-19 ne’e, grupu ne’ebé konstitui hosi grupu artista no kreativu sira inklui gropu “Klamar” foti inisiativa no bolu artista timoroan sira hodi kanta hikas múzika ne’e. Múzika ne’e nu’udar mensagem de coragem no tranquiladade iha tempu Estadu Emerjénsia ne’ebé oras ne’e la’o daudaun.

Insiativa no koreatividade hosi artista múzika timoroan sira ne’e fó rezultadu pozitivu. Hosi video ne’ebé sira fahe ona ba mídia sosiál, youtube no facebook, hetan reasaun oin-oin hosi publiku.

Ba fans sira ne’ebé haree no rona kantór no kantora sira hanesan Mely “Galaxy”, Dalia Kiakilir, Ego Lemos, Otopsy “Klamar” no seluk-tan nia performa liuhosi múzika “Mai Fali Eh” ne’ebé sira hananu, fó tebes mensajen “domin” ida be kle’an liu, hodi hatete ba publiku ka timoroan sira atu “Hakmatek iha Uma”.

Iha reasaun lubuk ida ne’ebé publiku hato’o liuhosi sira-nia varanda rede sosiál sira hafoin sira rona múzika “Mai Fali Eh” hodi espresa sira-nia apresiasaun. Apresiasaun hirak ne’e, sira hato’o no espresa liuhosi sira ida-idak nia “dalen” no maneira” ho sira-nia emosaun liuhosi hakerek;

“When voices are united in a common purpose, the result is harmonious and beautiful. May Timor-Leste’s response to the global Covid-19 Pandemic inspire the world, just as its heroic struggle for independence has done. Viva Timor-Leste and viva the “Mai fali e” choir of solidarity and human kindness!”

“Bainhira lian sira unidu ba objetivu komún ida, nia rezultadu ne’e armonia no furak. Karik Timor-Leste hatán ba pandemia global COVID-19 hodi inspira mundu, nu’udar luta eroiku ida ne’ebé mak halo ona ba independénsia. Viva Timor-Leste no viva “Mai fali eh” knananuk solidariedade no laran luak umanu nian,” dehan Kirsty Sword Gusmão ba editora Global Voice.

Iha biban hanesan, eskritór timoroan Luis Cardoso Noronha mós espresa nia hanoin kona-ba artista múzika timoroan oin-oin be hananu múzika tuan “Mai Fali Eh” ne’e, ho ida-idak nia karáter lian no ida-idak nia maneira hananu be kmanek tebes.

“Esta canção é muito antiga. Magnífica a interpretação dos artistas. Cantei-a nos meus tempos de menino. De partir o coração. Choro sempre quando a ouço. Creio que em tempos de pandemia o melhor é cada um ficar quietinho para não disseminar o vírus. Aliás como muito bem disse Rui de Araújo e recomenda o governo “Fiquem onde estão!” Lalika fila mai! Mas é sempre reconfortante ouvir a canção. Muito obrigado.”

Knananuk ne’e uluk nian. Interpretasaun magnífiku hosi artista sira. Ha’u kanta iha ha’u-nia tempu labarik nian. Fuan rahun. Ha’u sempre tanis bainhira ha’u rona. Ha’u fiar katak iha tempu pandemia ida ne’e di’ak liu ida-idak hakmatek atu labele hada’et virus. Alias, hanesan Rui de Araújo hateten di’ak tebes no rekomenda governu “Hela iha ne’ebé de’it!” Lalika fila mai! Maibé sempre diverte rona knananuk ne’e. Obrigadu barak,” Eskritór Timoroan Luis, Cardoso Noronha, hateten.

Dalen bele diferensa maibé rezultadu kreatividade hosi artista múzika timoroan sira ne’e mós bele halo ema rai seluk ne’ebé kleur hela no serbisu iha Timor-Leste ne’e laran monu. Tanba karik, nia hadomi tebes rai-doben Timor-Leste maka Professor iha Instituto da Língua Portuguesa-Universidade Nacional de Timor-Leste (UNTL), Ricardo Antunes, hafoin rona múzika ne’e iha yutube ka facebook, nia hakerek ninia mensajen apresiasaun;

“Em Timor-Leste, como em quase todo o mundo, as ordens são para ficarmos em casa, para prevenir o contágio com COVID-19. Há uma canção que é bastante apropriada a essa mensagem, e vários artistas timorenses gravaram-na a partir de casa. “Mai fali eh” é uma canção tradicional de Timor Leste. Canção muito conhecida em Timor, significa “Volta para casa”, em tétum, língua local e oficial de Timor Leste. É uma canção de embalar em que a mãe chama os seus filhos de volta a casa quando o sol se põe. Também pode ser interpretada com um significado mais abrangente evocando o regresso à ilha natal dos timorenses que partiram.”

Iha Timor-Leste no kuaze iha mundu tomak, iha orden atu ita hela iha uma hodi prevene kontájiu COVID-19. Iha knananuk ida ne’ebé mak besik atu hanesan ho mensajen ida, artista timoroan sira oin-oin halo gravasaun hahú husi uma. “Mai fali eh” knananuk tradisionál Timor-Leste nian ida. Knananuk ne’e koñesidu tebes iha Timor, iha tetun lian lokál no ofisiál Timor-Leste. Knananuk ida ne’e inan sira hakarak bolu fila oan sira fila ba uma bainhira loromatan tuun. Nune’e mós bele interpreta nu’udar signifikadu ida luan atu fila fali mai illa moris fatin ba timoroan sira ne’ebé mak iha li’ur,” Professor iha Instituto da Língua Portuguesa-Universidade Nacional de Timor-Leste (UNTL), Ricardo Antunes haktuir.

Artista múzika timoroan sira ne’ebé halibur malu no hananu múzika “Mai Fali Eh” ne’e mak Danny (Klamar), Titiso (Solo), Nelson (Gracias), Joviana (Duo ho Fela), Natalino (Solo), Leo (Biti Acoustic), Dedy (Sawarika), Bella Galhos, Daniel (Solo), Fela (Duo ho Joviana), Mento (Ulha Mousik), Mely (Galaxy), Dalia, Ana (Solo), Bepi (Solo), Lely, Otopsy (Klamar), Aga (War waik), Leyla (Solo), Sheila (Solo), Ego Lemos, Titha(Solo), Joyce & Jessica (Duo).

Kontribuente : Dalia Kiakilir

Editór           : Cancio Ximenes

HAKEREK NO HATÁN

Please enter your comment!
Please enter your name here