Embaixadora Estadu Unidu Amérika (EUA) ba Timor-Leste, Kathleen M. Fitzpatrick. Imajen António Goncalves

DILI, 11 abríl 2020 (TATOLI)–Tanba surtu COVID-19 mak Embaixada Estadu Unidu Amérika (EUA) iha Dili, Timor-Leste, aban (domingu, 12 abríl 2020), tuir planu sei lori fila sidadaun EUA na’in 14 hosi Timor-Leste ba Estadu Unidu Amérika.

Tuir komunikadu ne’ebé fó-sai husi Embaixada EUA iha Dili haktuir, Ministériu Negósiu Enstranjeiru EUA no Embaixada Estadu Unidu Amérika iha Timor-Leste laiha tan prioridade boot seluk aleinde siguransa ba sidadaun EUA nian ne’ebé hela iha nasaun seluk.

“Tanba limitasaun opsaun viajen komersial, finde semana ne’e, ami disponibiliza voo espesiál ida ba sidadaun EUA no residente permanente legál EUA nian sira neebé hakarak sai hosi Timor-Leste,” dehan Embaixadora EUA iha Timor-Leste, Kathleen Fitzpatrick, liuhosi komunikadu imprensa ne’ebé Tatoli asesu, ohin.

Iha loron 19 marsu 2020, Ministériu Negósiu Estranjeiru EUA nian sujere sidadaun EUA sira atu evita viajen internasionál sira tanba impaktu globál husi COVID-19.

Embaixada EUA iha Dili kontinua nia operasaun ho asaun prevensaun tuir Governu Timor-Leste nia Estadu Emerjénsia no kontinua iha vontade atu apoia Timor-Leste hodi hasoru dezafiu COVID-19 nian.

Iha loron abríl 9, Embaixadora Fitzpatrick anúnsia ona katak Estadu Unidu liuhosi nia Ajénsia ba Dezenvolvimentu Internasionál (USAID) iha kompromisu atu oferese millaun $1.1 hodi tulun Governu Timor-Leste hodi luta kontra COVID-19.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here