Ilustrasaun COVID-19. Imajen/Espesiál

DILI, 10 abríl 2020 (TATOLI) – Hafoin Ministériu Saúde deklara Timor-Leste rejista kazu pozitivu COVID-19 dahuluk iha 21 marsu, iha sesta (10/04), Portavós Sentru Integradu Jestaun Krize (CIGC, sigla portugés) liuhosi Sala Situasaun, deklara katak rejista tan kazu pozitivu COVID-19 daruak ba ema na’in-ida.

“Iha kazu foun ida tan, pasajeiru mai husi fronteira. Mai hela iha kuarentena semana ida mak mosu mear, inus metin, no agora nia iha  fatin izolamentu”, deklara Portavós CIGC, Sérgio Lobo liuhosi konferénsia imprensa ne’ebé hala’o iha Sentru Mídia COVID-19, iha Sentru Konvensaun Dili (CCD, sigla portugés), sesta ne’e.

Kona-ba informasaun adisionál kazu pozitivu foun nee, Sérgio Lobo dehan ema ne’e tama husi fronteira.

“Iha buat balun mak relasiona ho pasiente nian, pasiente ne’e to’o iha Timor-Leste iha 1 abríl husi fronteira, ba simu ho kareta husi Sala Situasaun mak haruka ba tula no sira hotu tama iha kuarentena”, nia relata.

Tuir eis Ministru Saúde ne’e, durante ne’e ema ne’ebé konfirmadu pozitivu hela iha kuartu mesak no laiha kontaktu fíziku ho ema seluk.

“Kuarentena ne’ebé mak nia hela ba, fatin ida disiplinadu tebes”, nia akresenta.

Entretantu, ema na’in-ida ne’ebé konfirmadu pozitivu ne’e timor-oan.

Ho situasaun ne’e, ekipa ministériu saúde ho CIGC halo ona verifikasaun ba ema sira ne’ebé durante ne’e besik ka halo kontaktu ho pasiente.

Nia realsa, pasiente ne’ebé fulan kotuk Ministériu Saúde deklara pozitivu, daudaun ne’e hafoin rezultadu teste konfirma ho laboratóriu iha Austrália katak daudaun ne’e negativu ona.

Husi rezultadu teste konfirma ona negativu dala-rua tutuir malu, tanba ne’e ekipa médika sira liberta ona hodi halo auto-kuarentena durante loron 40.

Liuhosi Sala Situasaun, CIGC nafatin rekomenda no husu partisipasaun komunidade ninian atu halo tuir no implementa Dekretu Governu kona-ba situasaun emerjénsia.

”Mesmu ita hatene katak medida ne’ebé foti ne’e kma’an no ladun forte, maibé ita hotu tenke kontribui atu mantein distansiamentu sosiál, atu labele halibur hamutuk, mantein distánsia fízika mínimu metru ida entre ema ida ho ema seluk no kuandu tama loja ka fatin públiku sira tenke uza máskara, mantein ijiene liman, faze liman hela de’it tanba ida ne’e mak ipoteze di’ak liu atu prevene Coronavírus”, nia subliña.

Jornalista: Antónia Gusmão

Editora: Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here