Ministru Koordenadór Asuntu Ekónomiku interinu no atuál Ministru Reforma Lejizlativa no Asuntu Parlamentár, Fidelis Manuel Leite Mangalhães. Imajen Tatoli/Egas Cristovão

DILI, 10 abríl 2020 (TATOLI) – Ministru Koordenadór Asuntu Ekónomiku interinu, Fidelis Manuel Leite Magalhães, apela ba autoridade lokál sira hakmatek no labele organiza komunidade sira, relasiona ho proposta subsídiu ba kada uma-kain $100 durante implementasaun Estadu Emerjénsia.

Iha enkontru Konsellu Ministru loron kuarta (08/04), Ministériu Koordenadór Asuntu Ekonómiku (MKAE) aprezenta proposta Pakote Ekonómika, maibé ezekutivu sira sei analiza no iha faze diskusaun, hafoin sei foti desizaun iha reuniaun tuir mai.

“Ita foin to’o iha faze diskusaun, ne’ebé seidauk iha aprovasaun husi Konsellu Ministru. Medida Ekonómika ne’ebé Governu sei foti, hein aprovasaun husi Konsellu Ministru no tersa semana oin, ami sei reuniaun dala-ida tán ho setór ekonómiku sira hodi halo avaliasaun liután ba proposta no halo ajustamentu balun. Semana oin maka aprezenta filafali ba Konsellu Ministru”, relata Ministru Fidelis iha Sentru Konvensaun Dili (CDD, sigla portugés), sesta ne’e.

Notísia Relevante: Ministru Fidelis Aprezenta Proposta Subsídiu ba Kada Uma-Kain $100 ba KM

Nune’e, governante ne’e apela ba komundiade sira atu kalma iha ida-idak ninia fatin.

“Ho ida ne’e, atu husu ba komundade sira atu tuur iha fatin, tanba Governu seidauk lansa prosesu ruma, se atu lansa prosesu ruma karik instituisaun Governu nian maka sei hola medida hirak ne’e. Iha kazu konkretu Ministériu Solidariendade Sosiál no Inkluzaun (MSSI) mak sei tun ba munisípiu to’o aldeia. Ne’ebé autoridade lokál sira antisipadamente lalika halo esforsu ruma tanba esforsu ne’ebé sei halo sei koordena ho MSSI no Ministériu Administrasaun Estatál (MAE). Ne’ebé autorizasaun ne’e sei tun husi ministériu sira”, esklarese Ministru ne’e.

Atuál Ministru Reforma Lejizlativa no Asuntu Parlamentár ne’e lakohi atu argumenta liután relasiona ho subsídiu ba kada uma-kain sira.

“Ha’u labele ko’alia subsídiu ne’e bele akontese ka lae, maibé bele dehan de’it hanesan MKAE iha dever atu rona liña ministeriál sira, hafoin aprezenta, argumenta no defende proposta ba iha Konsellu Ministru. Desizaun tomak ne’e desizaun Governu nian, ne’e katak Konsellu Ministru halo desizaun tuir deliberasaun”, nia akresenta.

Entretantu, enkontru ne’ebé sei realiza hikas iha tersa (14/04) semana oin, sei partisipa Banku Sentrál Timor-Leste (BCTL, sigla portugés) hodi halo avaliasaun jerál kona-ba situasaun ekonómiku no ajusta proposta iha parte balun, nune’e mós sei partisipa ekipa ida hosi Prezidénsia Repúblika nian.

Jornalista: Antónia Gusmão

Editor: Julia Chatarina

HAKEREK NO HATÁN

Please enter your comment!
Please enter your name here