Ministru Negosiu Estranjeiru no Kooperasaun MNEK, Dionisio Babo Soares. Imajen/Egas Cristovao

DILI, 10 abríl 2020 (TATOLI)Governu liuhosi Gabinete Sentru Informasaun Jestaun Krize (SIJK) sesta (10/04/2020) aprezenta ona pedidu ba Governu hodi husu tan apoiu médiku espesialista hosi nasaun Austrália, Xina no nasaun seluk tan ba prevene surtu COVID-19 iha Timor-Leste.

Primeiru-Ministru, Taur Matan Ruak maka aprezenta pedidu ne’e ba membru Governu sira durante reuniaun ho Komisaun Akompanamentu ba Avaliasaun Estratejia ba Prevensaun no Kombate Surtu COVID 2019 iha Sentru Konvensaun Dili (CCD-sigla portugés), sesta ohin.

“Baseia ba aprezentasaun husi Komisaun Sala Situasaun Jestaun Krize liuhusi Primeiru-Ministru, ohin hateten ita tenki husu ajuda ema espesialista sira husi li’ur mai Timor- Leste,”informa Ministru Negósiu Estranjeiru no Kooperasaun MNEK, Deonísio Babo Soares, ba jornalista iha CCD ohin.

Kona-ba médiku espesialista sira atu mai ka la mai no bainhira, Governante ne’e seidauk hatene loloos tanba Timor-Leste hato’o ona pedidu ba nasaun hirak ne’e maibé seidauk fó resposta.

“No médiku espesilista sira ne’e husi nasaun Xina, Austrália no mós nasaun ida ka rua tan mak atu apoiu ita,”realsa Babo.

MNEK Dionísio Babo Soares subliña Governu nafatin mantein kontaktu ho nasaun sira ne’e hodi hetan loloos resposta final.

Relasiona ho prosesu sosa ekipamentu protesaun COVID-19, nia dehan pagamentu hotu ona no tuir planu ekipamentu ne’e sei to’o iha rai-laran iha semana ida ka rua tan.

Jornalista : Felicidade Ximenes

Editór       : Agapito dos Santos

1 KOMENTÁRIU

  1. Doutor ka espesialista Timor-Oan sira labele ona ga para halo deit prevensaun, neebe tenqui selu espesialista internasional? Ho politika Governo mak iha, ho Timor-Oan nia esforsu rasik, ita hare nia rezultadus diak hela, kompara ho nasaun dezenvolvidu sira.

HAKEREK NO HATÁN

Please enter your comment!
Please enter your name here