Timor-oan na’in-tolu ne’ebé okupa kuartu ida iha Otél Luz Clarita, Bairro Formosa. Imajen/Noe Bonifácio

DILI, 10 abríl 2020 (TATOLI) – Otél Luz Clarita iha Bairro Formosa, sai fatin kuarentena ne’ebé estabelese husi Ministériu Saúde no daudaun timor-oan na’in-26 mak tenke kumpre kuarentena durante loron 14, tanba foin fila hikas husi nasaun afetada COVID-19.

Maibé daudaun ne’e sai preokupasaun ba timor-oan sira ne’ebé okupa kuarentena ne’e tanba ema na’in-tolu okupa kuartu ida, tanba ne’e sira husu atu Governu liuhosi Ministériu Saúde bele tau atensaun lalais hodi deside ema ida okupa kuartu ida hodi evita propagasaun COVID-19.

“Ami na’in-tolu hamutuk iha kuartu ida. Ho kondisaun emerjénsia ida daudaun ne’e ami la husu buat barak, maibé iha hanoin ruma katak se bele Governu prepara fatin ka kuartu ida ba ema ida ka rua de’it, atu nune’e bele hamenus liu tán interasaun entre ema iha kuarantena laran”, tenik Noe Bonifácio ba Agência Tatoli via Rede Sosiál, sesta ne’e.

Nia hatutan, sira kumpre ona loron 12 kuarentena, ne’ebé hahú tama kuarentena iha 29 marsu no tama husi Aeroportu Internasionál Comoro.

Maski nune’e, Noe Bonifácio dehan, loron-loron pesoál saúde sira sempre halo kontrolu saúde ba sira.

“Ami kontrolu saúde di’ak no kapas. Ami mós iha ezersísiu fíziku dader no lorokarik hodi mantein nafatin ami-nia saúde”, nia relata.

Kona-ba hahán, Noe fó sasin: “Ami nia hahán kapas tebes, iha variasaun ne’ebé mak di’ak hodi suporta ami-nia saúde. Ami agradese mós ba parte seguransa, pesoál saúde no sira ne’ebé mak toma konta ba ai-han. Tanba sira nia esforsu tomak hodi ajuda ami hala’o kuarantena ne’e ho di’ak”.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here