COVID-19

DILI, 09 abril 2020 (TATOLI)–Atu garante serbisu públiku liuliu ba autoridade lokál serbisu hamutuk ho governu liuliu ho PNTL no F-FDTL atu kontribui asegura regra estadu emerjénsia hodi kombate surtu COVID-19, presiza ekipamentu protesaun atu bele proteje sira-nia an bainhira hala’o knaar iha terrenu.

Xefe Aldeia 03 Lurumata, Zeferino Braz hateten, podér saida mak Governu fó ba Xefe Aldeia atu koopera hodi halo serbisu ne’e tenke iha ekipamentu protesaun ka prevensaun hodi nune’e sira iha vontade atu kontribui ba situasaun Estadu Emerjénsia ida ne’e.

Xefe Aldeia o3 Lurumata, Zeferino Braz. Imajen Tatoli/Osória Marques.

“Atu kontribui ba situasaun Estadu Emerjénsia na COVID-19 nian, pelumenus ami ne’e submete ba parte ne’ebé. Ami laiha koordenadór ida hodi lidera ami. Ami iha vontade atu kontribui maibé laiha baze legal ka laiha ekipamentu prevensaun ba ami. Ne’e para ami la’o karik, la’o hanesan ida ne’ebé. Tanba ami autoridade lokál hanesan Xefe Suku, Xefe Aldeia inklui ho ita-nia Konsellu Polisiamentu Komunitária no Ofisiál Polisía Suku, prontu atu kontribui,” dehan Xefe Aldeia 03 Lurumata, Zeferino Braz, ba Ajénsia TATOLI iha nia rezidénsia Lurumata, Suku Fatuhada, Postu Administrativu Dom Aleixo, Munisípiu Dili, kinta ne’e.

Nu’udar autoridade lokál, nia hatutan, antes ne’e nia kontribui ona hodi fó sai avizu ba komunidade sira atu hakmatek iha uma. Maibé, nia infarma, komunidade balu sei kontinua viola regra estadu emerjénsia hodi halo movimentu no sei kria gurpu-grupu iha bairru ka sira-nia uman.

“Antes ne’e ami aviza tiha ona maibé kontinua halo movimentu. Entaun iha ekipamentu ruma ba ami para bele halo serbisu maibé mak nune’e ami labele halo buat ida sein iha sasán protesaun ruma ba ami-nia vida,” nia sujere.

Notísia Relevante: Xefe Suku Comoro Husu Komunidade Hakmatek iha Uma

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here