Xefe Aldeia o3 Lurumata, Zeferino Braz. Imajen Tatoli/Osória Marques.

DILI, 09 abril 2020 (TATOLI)–Autoridade lokál balu iha Munisípiu Dili hahú halo rejistu ba komunidade sira atu hatene dadus uma-kain nian maibe atividade rejistu ne’e la’os tanba atu hetan subsidiu $100 kada uma-kain hosi Governu durante iha implementasaun Estadu Emerjénsia ne’e.

Xefe Aldeia 03 Lurumata, Suku Fatuhada, Postu Administrativu Dom Aleixo, Munisípiu Dili, Zeferino Braz hateten, nu’udar autoridade lokál iha inisiativa rasik hodi halo rejistu ba nia komunidade hamutuk uma-kain hira para bainhira akontese subsidiu ruma husi Governu fasil atu atende.

“La’ós tan informasaun ne’ebé Governu anúnsia katak kada uma kain sei hetan subsidiu $100 iha situasaun Estadu Emerjénsia ba COVID-19 nian mak ami halo rejistu. Maibé ita nu’udar autoridade lokál ida iha planu serbisu durante tinan tolu nia laran. Tanba ne’e, ha’u iha inisiativa rasik hodi rejistu ha’u-nia komunidade iha Aldeia 03 Lurumata atu hatene uma-kain hira mak iha aldeia ne’e nia laran. Se Governu prezisa dadus, ita atende lalais,” dehan Xefe Aldeia 03 Lurumata, Zeferino Braz, ba Ajénsia TATOLI iha nia rezidénsia, Lurumata, kinta ne’e.

Nia dehan, relasiona ho surtu COVID-19 ne’ebé Prezidente Repúblika dekreta Estadu Emerjénsia atu komunidade hotu-hotu tuur hakmatek iha uma ne’e, hanesan oportunidade di’ak ba autoridade lokál atu bele foti komunidade sira-nia dadus ho fasil.

“Ha’u ko’alia loloos de’it katak laiha karta autorizasaun ida ba ami atu halo rejistu. Maibé ita-nia komunidade sira asesu ba mídia sosiál katak sira sei hetan subsidiu husi Governu entaun ho razaun ida ne’e komunidade sira ohin mai halo rejistu. Se sira mai ona, aproveita tempu ida atu fasilita sira hodi hetan dadus ho fasil,” nia haktuir.

Nu’udar autoridade lokál, nia dehan, iha nia papél atu serbi ba nia komunidade sira hodi halo kontrolu. Nia informa, ohin komunidade sira mai rejista tan uma-kain 32 maibé antes ne’e nia parte mós prepara ona dadus uma-kain iha Aldeia 03 Lurumata hamutuk 911.

“Ha’u-nia papél nu’udar autoridade lokál mak oinsá serbi no kontrolu ita-nia komunidade sira. Tanba ne’e, ohin sira mai, ha’u simu no rejistu hodi hein ba informasaun husi Estadu no Governu ida ne’e,” nia dehan.

Bazeia ba informasaun husi Governu ne’e, nia dehan, nia parte telefone ba Administradór Dom Aleixo no Xefe Suku Fatuhada no sira hatan bele kontinua prepara dadus antes parte Estatal presiza dadus husi kada Aldeia no Suku, entaun bele entraga dadus sira-ne’e ba Suku no Postu.

“Ha’u rona informasaun katak Governu atu halo subsídiu ba komunidade sira ne’ebé hela iha uma. Bazeia ba dekretu Estadu Emerjénsia atu komunidade sira labele halo movimentu ne’e, ho ida ne’e ha’u prepara kedas ona dadus no aprezenta ona ba ita-nia Xefe Suku no Administradór Dom Aleixo,” nia hateten.

Zeferino Braz informa, kriteriu ba komunidade sira mai rejistu tenke lori ho sira-nia fixa família. Nia dehan, karik laiha fixa família entaun hatudu kartaun eleitorál feen-larn nian mak bele rejistu.

Nia haktuir, aban laiha rejistu tanba sesta feira santa maibé sei kontinua fali rejistu iha segunda-feira (13 abril 2020) semana oin. Tuir dadus, nia dehan, iha Aldeia 03 Lurumata iha Uma-kain hamutuk 943 inklui ho sira ne’ebé ohin rejistu foun ne’e.

Tuir observasaun, iha Xefe Aldeia 03 Lurumata nia rezidénsia, prepara mós fasilidade fase liman nian hanesan sabaun no bee hodi hatuur iha varanda atu nune’e komunidade sira antes atu rejistu tenke fase liman uluk.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here