Diretór Sentru Integradu ba Jestaun Krize, Brigadeiru Jenerál, João Miranda Aluk, enkontru ho Primeiru-Ministru, Taur Matan Ruak. Imajen/Mídia-GPM

DILI, 10 abríl 2020 (TATOLI)-Diretór Gabinete Sentru Integradu Jestaun Krize (CIGC-sigla portugés), Brigadeiru Jenerál, João Miranda Aluk, deklara sei la fó autorizasaun ba sidadaun sira atu halo vizita bá sira-nia família bainhira tama iha kuarentena obrigatóriu durante loron 14.

“Maluk sira ne’ebé mak iha kuarentena laiha família ka instituisaun ida atu bá haree nia maluk kuandu laiha autorizasaun hosi instituisaun ne’ebé responsavél ba fatin sira ne’e,” deklara Aluk ba jornalista sira durante konferénsia imprensa, sesta (10/04/2020) iha Sentru Konvensaun Dili, (CCD-sigla portugés).

Nia fó sai desizaun ne’e tanba Ministériu Saúde deteta tan pasiente daruak COVID-19 pozitivu ho nasionalidade hanesan Timoroan.

Notísia Relevante :Timor-Leste Rejista Tan Kazu Pozitivu COVID-19 Daruak ba Ema Na’in-Ida

Mantein distánsia sosiál importante atu prevene an hosi transmisaun surtu Coronavirus, nune’e mós populasaun sira tenke kumpre regulamentu ne’ebé fó sai hosi Ministériu Saúde ho Organizasaun Mundiál Saúde (OMS) katak fase liman bebeik ho sabaun, fani ka me’ar tenki taka ibun no seluk tan.

“Medida ne’ebé seguransa foti hodi halao iha terenu atu asegura ba ita Timoroan hotu atu bele salva an hosi COVID-19,”nia hatutan.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here