Xefe Bankada CNRT, Duarte Nunes. Imajen Tatoli/Egas Cristóvão

DILI, 08 abríl 2020 (TATOLI)—Xefe Bankada Parlamentár CNRT, Duarte Nunes afirma, líder istóriku Kay Rala Xanana Gusmão, hakarak Governu tenke iha preparasaun másimu hodi halo prevensaun no kombate surtu COVID-19.

Xefe Bankada Parlamentár CNRT, Duarte Nunes, afirma reuniaun alargada iha rezidénsia Xanana Gusmão, iha Lecidere, durante oras neen (15:00–21:00) nia laran, kuadru sira ko’alia ajenda importante liu mak kona-ba pervensaun ba surtu COVID-19 no ministru sira idak-idak ko’alia kona-ba asuntu refere.

Duarte hateten, iha momentu ne’e ministru ne’ebé ko’alia mak hanesan Ministériu Negósiu Estranjeiru no Kooperasaun, Ministru Defeza no Seguransa no Ministra Finansa Ein-Ezersísiu.

“Hanesan fó hanoin ba malu oinsá ita haree esforsu durante ne’e to’o iha ne’ebé entaun haree katak buat moras ne’e mai hosi li’ur entaun ita taka dalan para labele mai. Ida-ne’e mak katuas Xanana dehan, nune’e imi (governu) ko’alia ho Primeiru-Ministru oinsá ita atu taka dalan ne’e, haruka labarik sira ita-nian hela iha ne’ebá, ita fó osan ba sira no labele lori moras ne’e mai. Kuandu moras ne’e mai atu fó sala ba sé. Katuas Xanana nia hakarak ne’e ita-nia preprasaun tenke másimu hasoru propagasaun COVID-19 ne’e,” Xefe Bankada Parlamentár CNRT ne’e informa ba Agência TATOLI, liuhosi telemovel, kinta ne’e.

Ho preokupasaun ne’e, Duarte fó-sai katak, ne’e mak halo Xanana Gusmão la tuur hakmatek. Tanba, moras ne’e mosu ne’e la haree ba sé-sé entaun katuas Xanana enkoraja komunidade halo limpreza jerál nune’e moras ne’e mosu karik ema hotu-hotu iha ona preparasaun.

Xefe Bankada CNRT ne’e akresenta, Xanana Gusmão fó orientasaun katak ho situasaun hasoru COVID-19 ne’e labele hanoin Governu mak tenke rezolve maibé ema hotu tenke ajuda Governu halo prevensaun.

“Ida-ne’e mak katuas Xanana nia kontribuisaun iha ámbitu kombate hasoru COVID-19 ne’e. Labele hanoin dehan nusá mak membru Governu sira halo fali enkontru ho Xanana, nusá la enkontru de’it ho Primeiru-Ministru. Maibé, liuhosi ideia maun Xanana nian membru Governu sira bele fó hanoin ba Primeiru-Ministru, tanba ita tenke fó hanoin ba malu antes moras ne’e mosu,” Duarte Nunes informa.

Deputadu CNRT ne’e hateten, iha momentu ne’e membru Governu sira fó hanoin ba malu no hotu-hotu konkorda hodi hatán ba situasaun ne’e.

“Katuas Xanana fó hanoin katak buat ida ameasa mai ne’e di’ak liu ita hakmatek iha idak-idak nia fatin. Kuandu moras ne’e la mai ona, ita ko’alia situasaun polítika. Ne’e hanoin hodi fó hanoin ba membru Governu sira, fó sujestaun ba Governu hodi oinsá mak trava tiha moras ne’e tama mai,” nia dehan.

Nia dehan, Xanana Gusmão mós prepara tanba desizaun ba Estadu Emerjénsia no balun hela hakmatek iha uma maibé loke nafatin entaun la konsiente ho desizaun ne’e.

“Tuir ami-nia haree dehan ita-nia problema boot agora mak moras ne’e sei da’et entaun ba povu no povu mak sei terus. Tanba ne’e mak enkontru ne’e fó hanoin ba Ministru Negósiu Estranjeiru no Kooperasaun, Dionísio Babo Soares, Ministra Finansa Ein-Ezersísiu, Sara Lobo Brites, Minitru Defeza no Seguransa, Filomeno Paixão, oinsá mak para tiha no depois osan ne’ebé fó subsídiuu ba ita-nia estudante sira, ita haree loos mak moras ne’e hotu, hotu ona,” nia esplika.

Notísia Relevante: Reuniaun AMP Halibur Ideia Apoia Governu Kombate COVID-19

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here