Ambiente Selebrasaun Misa Kinta-Feira Santa iha Igreja Katedrál Vila-Verde, kinta (09/10). Imajen Tatoli/Egas Cristovão

DILI, 09 abríl 2020 (TATOLI) – Sarani Katólika espresa sentimentu triste iha Selebrasaun Misa Kinta-Feira Santa, ho situasaun surtu COVID-19 ne’ebé halo selebrasaun Semana Santa tinan ne’e diferente tinan sira liu ona, tanba nonok no hakmatek nia-laran no ema hotu akompaña misa liuhosi meiu komunikasaun sosiál.

Sarani Benedito Ruben dos Reis, nu’udar Kartóriu Parokiál husi Parokia Katedrál, hateten nia parte sente triste ho selebrasaun Misa Kinta-Feira Santa tanba la hanesan kada tinan, ne’ebé ho antuziasmu sarani.

Sarani Benedito Ruben dos Reis, nu’udar Kartóriu Parokiál husi Parokia Katedrál. Imajen Tatoli/Egas Cristovão

“Ha’u sente triste ba Páskoa ida-ne’e tanba ha’u bele kompara ho Páskoa tinan kotuk ho tinan agora ne’e la hanesan liu kedan, tanba sarani barak la mai tuir misa iha Uma-Kreda laran. Agora tinan ne’e sira selebra Páskoa iha fuan laran de’it no haree husi televizaun. Ida-ne’e maka halo ha’u sente iha falta“, nia dehan ba Agência Tatoli, hafoin ramata Misa Kinta-Feira Santa iha Igreja Katedrál, ohin.

Nia rekoñese, situasaun sira ne’e diferente tanba agora daudaun iha situasaun surtu Coronavírus.

“Coronavírus halo hotu diferente, maibé hanesan servidór ativu iha igreja nafatin kumpre orientasaun Amu atu ajuda misa hodi fó susesu ba Misa Páskoa tinan ne’e”, akresenta Bendito.

Iha fatin hanesan, Sarani Manuel Verdial, nu’udar Konsellu Pastorál Parokia Katedrál, hateten nia parte sente triste  tanba ho situasaun ne’e halo buat hotu nafilak no obriga sarani sira tuir Misa Semana Santa tinan ida ne’e iha ida-idak ninia uma.

Sarani Manuel Verdial, nu’udar Konsellu Pastorál Parokia Katedrál. Imajen Tatoli/Egas Cristovão

“Sente triste no hakfodak haree oin loron misa iha igreja laran mamuk, maibé ita hotu tenke komprende tanba Coronavírus. Maski nune’e, ha’u husu ita labele lakon domin no fiar ba Jesus Kristu nu’udar sarani katólika”, nia realsa.

Tanba ne’e, nia husu ba sarani sira hodi kontinua hatudu nafatin fiar iha Semana Santa, nune’e Nai Jesus bele hadook moras a’at sira husi sarani sira.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here