Xefe Estadu Maiór Forsa Defeza Timor-Leste (F-FDTL), Majór Jenerál Lere Anan Timur. Imajen Tatoli/Egas Cristovão

DILI, 09 abríl 2020 (TATOLI) – Polísia Sientífika Investigasaun Kriminál (PCIC, sigla portugés) liberta hikas suspeitu ho inisiál YFTB, ne’ebé halo mal tratamentu iha loron hirak liubá, ba Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur, liuhosi mídia sosiál Facebook, tanba konsidera laiha indísiu krime.

Adjuntu PCIC, Adino Nunes Cabral, haktuir, iha kuarta (08/04) husi parte FALINTIL-Forsa Defeza Timor-Leste (F-FDTL), liuhosi servisu intelijénsia, informa ba parte PCIC katak iha utilizadór Facebook ida mak hasai liafuan tolok ba Jenerál Lere.

Hafoin hetan informasaun ne’e, iha oras 12 nia laran parte PCIC identifika suspeitu ne’ebé deskonfia envolve ba aktu iresponsável ne’e no submete ba prosesu investigasaun.

“Ita halo verifikasaun hotu no halo ezame ba nian telemóvel, ita hotu hatene katak buat ida tolok, trata ema ne’e ita seidauk iha andamentu legál propriamente ne’ebé regulariza katak, ne’e hanesan atus krime ida. Tanba ne’e, Polísia uza oras 12 halo identifikasaun ba suspeitu, maibé laiha indísiu ruma ba nia, tanba ne’e ita tenke liberta filafali hanesan saida maka haktuir iha ita-nia prosesu penál”, dehan Adino iha Farol, kinta ne’e.

Nia esplika, liafuan ne’ebé maka suspeitu fó sai ne’e hanesan liafuan tolok, ne’ebé hanesan baze ba PCIC hodi ezerse ninia funsaun ho akordu lei no halo investigasaun karik iha indísiu krime ruma.

“Entaun ita simu tiha informasaun sira ne’e iha pájina Facebook no ita uza ita-nia kompeténsia ba prevensaun kriminál, ikus mai ita halo analiza fonte aberta iha Facebook no konsege identifika autór ba identidade ne’e. Ita lori nia mai hodi halo izame ba nia telemóvel no ita identifika ba identidade balun ne’ebé maka ita halo identifikasaun polisiál durante oras 12 nia laran”, nia akresenta.

Adjuntu PCIC ne’e afirma tan katak karik suspeitu ne’e kontinua halo aktu hanesan, maka  PCIC sei prosesa nia tuir kodigu prosesu penál.

Maski fó liberta ona, maibé tuir Adjuntu ne’e, ema ne’ebé komete ona krime, PCIC sei ezerse ninia kompeténsia tuir lei orgánika ne’ebé estabelese ona, katak sei prosesa ba kualker krime, tuir dever morál PCIC ne’ebé la’ós ba kazu ida de’it, maibé ba kualker krime.

“Ita halo prosesa ne’e kompeténsia PCIC nian, maski la tama iha kompeténsia reservada  PCIC maibé hanesan kompeténsia jenérika, bele halo notifikasaun ba Ministériu Públiku hodi halo asaun penál konforme sira maka sei dirije inkéritu, katak delega ba PCIC ka delega ba órgaun polisiál kriminál sira seluk”, nia esplika.

Lere Perdua Suspeitu YFTB

Ba kestaun ne’e, iha kinta (09/04), Jenerál Lere Anan Timur, halo konferénsia imprensa ne’ebé partisipa direita husi suspeitu ne’ebé deskonfia halo mal tratamentu nian no hateten katak nia parte perdua suspeitu ne’ebé maka tolok nia.

“Ha’u hanoin katak ita-bo’ot ninia sala ne’e, lei fó dalan atu kaptura no kastigu, maibé ohin loron ha’u perdua no lalika fó kastigu, maibé ha’u hanorin de’it aban bain-rua sé ó nia maluk sira seluk halo aktu hanesan ne’e, hateten ba sira hodi muda hahalok. Biar ita-nia aman boot iha Indonézia ka mate iha Indonézia, no agora sei iha Indonézia, maibé ita-bo’ot mai ona Timór, tanba ne’e tenke tuir lei no regra Timór nian”, tenik Lere.

Nia konsidera, suspeitu ninia aktu hanesan deskonfia ida, ho motivu instrusaun ruma karik atu halo ema la fiar líder nasionál sira.

Tanba ne’e, Lere husu ba órgaun kompetente sira hodi halo lejizlasaun, nune’e bele kriminaliza aktu pesoál ne’ebé defama no estraga ema-nia privasidade.

“Ha’u hanoin katak presiza hanoin no apela na ukun-na’in sira, tantu Governu, Parlamentu no Tribunál tenke halo lei ruma atu bele kastigu ema sira ne’ebé laiha étika no laiha disiplina, hodi tolok líder nasionál sira arbiru de’it”, nia subliña.

Jenerál Lere alerta tan katak, iha mundu daudaun ne’e bele halo aktu oinsá mós ohin loron ne’e modernu.

“Ita iha aparelu sientífiku ne’ebé bele deteta ba ema nia aktu saida de’it mós bele hatene”, nia realsa.

Jornalista: Natalino Costa

Editora: Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here