Ilustrasaun Justisa. Imajen/Observador

DILI, 09 abríl 2020 (TATOLI) – Adjuntu Polísia Sientífika Investigasaun Kriminál (PCIC, sigla portugés), Adino Nunes Cabral, konsidera iha duni nesesidade atu órgaun kompetente sira kria Lei Sibernétika, nune’e bele kriminaliza aktu difamasaun ne’ebé pesoál balun halo hodi hatún ema seluk ninia dignidade.

“Tuir ita-nia Kódigu Penál, tolok ema ne’e la’ós krime, tanba ne’e ita-nia Estadu iha obrigasaun atu halo lei propriamente ida, nune’e bele regulariza aktu balun ne’ebé ofende ema-nia dignidade hanesan tolok ema, trata mal ema, ka difama ema. Maski difamasaun rasik ita iha ona Lei Prosesu Sivíl ne’ebé regulariza, maibé iha ámbitu sivíl nia kuandu prosesuál sivíl maka Estadu hanoin hakarak kriminaliza aktu ne’e, maka presiza enkuadramentu legál ruma atu ita regulariza”, dehan Adino ba Agência Tatoli, iha ninia knaar fatin, Caicoli, kinta ne’e.

Tanba ne’e, nia parte sujere katak presiza iha lejizlasaun atu regulariza aktu sira ne’e tanba daudaun iha mundu ne’e moris ho teknolojia avansadu, nune’e presiza iha regulariza.

“Ha’u sujere ita kria Lei Sibernétika atu regulariza aktu sira ne’e ka dala barak ema dehan lei kona-ba informasaun teknolojia. Ita presiza lei ne’e tanba ho mundu ida agora ita moris ho mídia sosiál ema hotu asesu mídia sosiál, ne’ebé balun uza ho di’ak no balun uza ho ladún edukativu”, nia realsa.

Tuir nia, balun ne’ebé uza ladún edukativu, iha tendénsia bele prejudika ema seluk, liuliu ba ema ninia dignidade ka buat seluk no bele mós lansa  informasaun seluk ne’ebé liga ba ema-nia trakuilidade públika.

Haree ba kestaun hirak ne’e, tuir nia, Estadu tenke interven atu regulariza no husu parte Governu no Parlamentu atu hatuur tuir Konstituisaun kona-ba inisiativa lei.

“Lei Sibernétika ita bele regulariza substantivamente no prosesualmente. Substantivamente refere ba nia aktu ne’ebé maka ema ida halo hodi kriminaliza aktu ne’ebé maka nia halo, enkuantu prosesualmente kona-ba prosesu oinsá maka atu prosesu nia hanesan bele tama ba ema nian Facebook, oinsá bele halo ezame ba ema nian Facebook, no ba ema nian telemóvel. Ida-ne’e maka ita bolu prosesualmente, ne’ebé ninia prosedimentu maka bele regulariza iha tempu hanesan iha Lei Sibernétika”, dehan Adjuntu PCIC ne’e.

Adino Cabral fó sujestaun, hodi Estadu bele tetu, tanba PCIC hanesan ajente estadu nian, ne’ebé órgaun Polísia Kriminál nia ezekuta no hala’o ninia knaar hodi asegura prinsípiu legalidade.

Tanba daudaun mosu barak kona-ba kazu difamasaun, maibé PCIC lakohi posteriormente atu pronunsia, maibé kabe ba kompeténsia superior estadu maka bele haree.

“Ha’u lakohi fó opiniaun, maibé haree ba situasaun ne’e, iha tiha ona hanoin katak presiza regulariza, maibé ida ne’e hanesan hafoin”, nia salienta.

Molok ne’e, Prezidente Komisaun A Parlamentu Nasionál (PN), ne’ebé trata asuntu Konstituisaun no Justisa, Carmelita Caetano Moniz admite, deklarasaun ne’ebé nia fó sai kona-ba kriminaliza difamasaun hanesan deklarasaun pesoál maibé husi Bankada Governu seidauk hanoin atu halo lejislasaun.

“Ita tenke tau diferensa entre krítika, difamasaun, injúria no kalúnia. Ne’e ha’u-nia hanoin pesoál, ami husi Parlamentu liuliu ha’u-nia Bankada Governu seidauk iha hanoin atu kriminaliza difamasaun tanba agora iha hela prosesu reforma lejislativa, reforma judisiáriu no reforma setór justisa”, tenik Prezidente komisaun A ne’e, iha Suai Room, Timor Plaza, foin lalais ne’e.

Tuir Deputada ne’e, daudaun PN iha faze atu haree oinsá implementasaun lei, oinsá lala’ok komunidade, maibé iha futuru iha hanoin katak presiza fali kriminaliza difamasaun, nia nu’udar deputada hela promete sei tau kritériu ne’ebé rigorozu kona-ba saida maka difamasaun, injúria no kalúnia.

“Tanba krítika ne’e, ezemplu bainhira ha’u halo krítika ida, jornalista ida tau iha jornál katak estrada ida aat ka ponte ida aat, Governu laiha kapasidade ka laiha kualidade, ne’e krítika la’ós insultu,” katak reprezentante povu ne’e.

Deputada ne’e realsa, insultu, kalúnia, lia-bosok, inventa sasán iha país balun ema kriminaliza tanba konsidera difamasaun ho hanoin ida pembunuhan karakter (oho ema-nia karakter) publikamente.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here