Portavós Sala Situasaun Sentru Integradu Jestaun Krize, Odete Viegas. Imajen/Egas Cristovão

DILI, 09 abríl 2020 (TATOLI) – Portavós Sentru Integradu Jestaun Krize (CIGC, sigla portugés), Odete Viegas, informa médiku espesialista na’in-tolu ne’ebé daudaun ne’e foti espesialista médisina iha kuba, tenke tama iha kuarentena tanba kontaktu direta ho ema ne’ebé pozitivu COVID-19 iha nasaun Kuba.

“Kona-ba médiku timor-oan sira ne’ebé foti espesialidade iha Kuba iha médiku na’in-tolu, sira ne’e daudaun tama iha kuarentena tanba sira atende hela ema sira ne’ebé moras COVID-19, la signifika sira pozitivu. Signifika katak sira iha ona kontaktu ho ema ne’ebé pozitivu no sira presiza atu halo kuarentena, no kuarentena mós ita iha ona akordu ho Kuba entaun ida ne’e hola parte mós husi servisu ida ne’ebé maka Ministériu Saúde públika Kuba atubele haree ita nia maluk sira iha kuarentena”, relata Odete Viegas liuhosi konferénsia imprensa iha Sentru Mídia COVID-19 iha Sentru Konvensaun Dili (CCD, sigla portugés), kinta ne’e.

Maske nune’e, atuál Diretora Jerál Prestasaun Saúde ne’e afirma, to’o agora seidauk hetan informasaun klaru liu maibé sei buka hatene.

Kona-ba akompañamentu Governu Timor-Leste nian ba médiku no estudante sira ne’ebé estuda iha rai-liur, tuir portavós, Governu foin lalais halo ona diskusaun kona-ba médiku no estudante sira ne’ebé daudaun estuda iha rai-li’ur no sei hetan mós atendimentu espesiál husi Governu liuhosi subsídiu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here