Selebrasaun Misa Kinta-Feira Santa iha Igreja Katedrál Vila-Verde, kinta (09/10). Imajen Tatoli/Egas Cristovão

DILI, 09 abríl 2020 (TATOLI)–Arsebispu ba Arkedioseze Metropolitana Dili, Don Virgílio do Carmo da Silva, apela ba ukun-na’in sira atu banati Jesus Kristu hodi sai servidór loloos ba povu.

Don Virgílio ne’ebé prezide Misa Kinta-Feira Santa iha Igreja Katedrál Vila-Verde, liuhosi ninia omília konsidera ema ne’ebé sente ninia-an boot, tenke sai uluk servidór.

“Iha loron dahuluk Semana Santa, Jesus konvida ita hahú husi ema ki’ik to’o boot no ita hotu ne’ebé sente ita-nia an sarani, maski dala barak ita la’o kleuk más tempu ida-ne’e Nai-Maromak kovida ita atu haka’as-an sai sarani ne’ebé loos iha Maromak nia futar oin, atu hola konxiénsia ida-ne’e oinsá maka ha’u mós iha família no institusaun privadu ka públiku, iha sosiedade ka nasaun ida-ne’e, tenke buka atu hatudu iha Maromak nia futar-oin ne’ebé loos maka atitude servidór, tanba Nai Jesus rasik dehan ukun-na’in nasaun sira nian domina maibé entre imi eskolante sira labele sente-an boot, tenke serví ki’ik-sira, tanba ida-ne’ebé sente-an boot tenke sai servidór”, dehan Don Virgílio.

Arsebispu ba Arkedioseze Metropolitana Dili, Don Virgílio do Carmo da Silva, bainhira prezide Misa Kinta-Feira Santa iha Igreja Katedrál, Vila-Verde, kinta (09/04). Imajen Tatoli/Egas Cristovão

Tuir Amu ne’e, iha ida-idak ninia fuan laran tenke iha sentimentu serví ba malu, tanba ema barak presiza ita-nia domin hanesan saida maka Jesus  hanorin ona.

“Ita hasai ita-nia títlu sira, nune’e tau fali títlu servidór-nia, atan-nia no ida ne’e eskolante Jesus ninian tenke lori ita atu banati”, nia akresenta.

Don Virgílio adianta, iha situsaun pandemia nian ne’e konvida ita atu hakbesik-an ba Maromak.

“Ho kondisaun ida-ne’e ita tenke sai servidór tanba ema barak presiza ita-nia tulun. Ita-nia Amu Papa dehan tenke sente sai servidór loloos duni iha moris loron-loron, problema maka ita-nia hanoin no hakarak la hanesan no dala barak ita diskute maibé ne’e hola parte iha moris no  hahalok sira ne’e ita tenke tau ba kotuk”, Don Virgilio subliña.

Nia realsa, jestu servidór Jesus hatudu ba ninia eskolante sira katak biar nia mai hanesan Nai nia-oan, maibé hatudu ezemplu di’ak.

“Ita haree kona-ba Pedro, oinsá nia reazen hasoru Jesus bainhira fase ninia ain, maibé ida-ne’e Jesus insisti nafatin atu fase duni apóstulu sira-nia ain. Se ha’u la fase ó nia ain, ó mos labele sai ha’u-nia ain, ó mós labele hela ho ha’u”, Don Virgílio haklaken.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here