Portavós Sala Situasaun Sentru Integradu Jestaun Krize, Odete Viegas. Imajen Tatoli/Egas Cristovão

DILI, 09 abríl 2020 (TATOLI) – Portavós Sentru Integradu Jestaun Krize (CIGC, sigla portugés) liuhosi Sala Situasaun, Odete Viegas, deklara katak bainhira sidadaun sira ne’ebé hela iha kuarentena la kumpre medida prevensaun COVID-19, maka Governu sei foti sansaun hodi estende tan loron iha kuarentena maske kumpre ona loron 14.

“Aproveita oportunidade ida ne’e, hakarak nafatin apela ba sira iha kuarentena, dadaun ne’e husu tanba iha mós keixa barak katak nafatin halibur malu no la kumpre distánsia sosiál. Tanba ne’e husu atu kumpre regra, atu nune’e hela to’o de’it loron 14 mak la kumpre, ami foti sansaun hodi estende nafatin hodi hela iha kuarentena”, relata Odete Viegas iha Sentru COVID-19, iha Sentru Konvensaun Dili (CCD, sigla portugés), kinta ne’e.

Atuál Diretora Jerál Prestasaun Saúde apela mós ba sidadaun sira ne’ebé kumpre iha loron 14 iha kuarentena, atu nafatin kumpre medida prevensaun.

“Husu mós ba hirak ne’ebé sai ona husi kuarentena, atu mantein nafatin distánsia sosiál, mantein ijiene pesoál iha fatin hela ba, evita halibur malu, no karik iha sintoma ruma relasiona ho COVID-19 atu kontakta ba númeru 119.

Tuir dadus atuál iha loron kinta (09/04), relata katakema na’in-984 mak daudaun hela iha kuarentena ne’ebé Governu liuhosi Ministériu Saúde prepara.

Enkuantu, hosi totál ne’e na’in-950 iha kuarentena no na’in-34 iha auto-kuarentena.

Nune’e mós, hirak ne’ebé iha kuarentena iha Munisípiu Dili hamutuk 820, iha munisípiu seluk hamutuk 130, no iha auto-kuarentena iha Dili na’in-sia no munisípiu hamutuk 25.

“Dadus husi horiseik hamutuk 908 no ohin loron 984, hafoin kuarentena pasa ba loron 14 kompleta hamutuk 894, kompara ho horseik 777. Husi totál númeru ne’ebé kumpre ona loron 14 iha kuarentena iha Dili na’in-723, munisípiu 173, ho totál hamutuk 896”, nia akresenta.

Entretantu, daudaun ne’e suspeitu ba surtu COVID-19 hamutuk na’in-50, provável ka hein rezultadu ezame laboratóriu na’in-ida, konfirmadu ka pozitivu nafatin na’in-ida, no negativu na’in-48.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here