Abitante sira ne'ebé fila hosi Indonézia no kumpre ona kuarentena obrigatoriu loron 14 iha fatin kuarentena Tibar ho INAP, kinta (09/04/2020), re-integra ona ba ida-idak nia família. Imajen/Antonio Goncalves

TIBAR, 09 abríl 2020 (TATOLI)-Ekipa liña ministeriál, ohin, re-integra tan abitante na’in 52 iha kuarentena rua hodi fila-fali ba ida-idak nia uma.

Notísia Relevante : Abitante 164 iha Kuarentena Fila-ba Uma

Diretóra Jerál Prestasaun Saúde, Odete Viegas da Silva.Imajen.Imajen/Antonio Goncalves

Abitante hirak-ne’e durante loron 14 submete ba kuarentena obrigatóriu iha fatin Kuarentena Institutu Nasionál ba Administrasaun Públiku (INAP) ho Tibar  bainhira sira fila hosi nasaun afetadu Coronavirus ka COVID-19.

Abitante sira-ne’e, kompostu hosi na’in 25 kuarentena iha Tibar no nain 27 submete ba kuarentena iha INAP.

Diretora Jerál Prestasaun Saúde hosi Ministériu Saúde, Odete da Silva Viegas, hateten, abitante hirak-ne’e durante tama iha kuarentena tuir vijilánsia ekipa médiku sira la identifika sintoma ruma COVID-19.

Sira hotu livre hosi COVID-19 no bele fila ona ba ida-idak nia uma,” hateten Odete Viegas hodi afirma tan katak, bainhira abitante sira-nee iha uma mak sente sintoma ruma bele halo kontaktu kedas ho parte médiku.

 Odete da Silva Viegas mós apela ba abitante sira-ne’e atu fahe esperiénsia ho informasaun sira ne’ebé durante ne’e sira hetan iha kuarentena atu bele kontribui hadook sosiedade Timor-Leste hosi surtu COVID-19.

Partisipa iha serimónia re-integrasaun ne’e, kompostu hosi reprezentante ekipa liña ministeriál, autoridade lokál no autoridade seguransa.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here