Airnorth to’o iha Aeroportu Internasionál Prezidente Nicolau Lobato, Comoro. Imajen Tatoli/António Gonçalves

DILI, 09 abríl 2020 (TATOLI) – Governu liuhosi Autoridade Aviasaun Sivíl Timor-Leste (AACTL, sigla portugés) iha loron 4 abríl deside suspende provizóriu operasaun komersiál internasionál husi nasaun li’ur hodi evita propagasaun surtu COVID-19.

Maski nune’e, haree ba nesesidade iha situasaun emerjénsia nia laran, Governu Timor-Leste liuhosi Ministériu Transporte Komunikasaun (MTK) iha loron tersa (07/04) deside selebra akordu ho Airnorth, ne’ebé sei permite operasaun aéreu sira entre Dili no Darwin.

“Hanesan determina ona iha akordu ne’e, Airnorth sei semo ba mai semana ida dala-tolu entre Dili no Darwin hodi tula ai-moruk, emerjénsia médika no fornesimentu sasán no servisu esensiál sira. Servisu sira ne’e, sei hahú iha semana oin, maibé semo dahuluk sei hala’o iha sesta, 10 abríl”, refere nota imprensa ne’ebé Agência Tatoli asesu liuhosi pájina ofisiál Governu, kinta ne’e.

Ministru Estadu Prezidénsia Konsellu Ministru, Hermenegildo Augusto Cabral Pereira, relata katak akordu ne’e asina husi Ministru Transporte no Komunikasaun, José Agostinho da Silva, no hetan ona aprovasaun husi Konsellu Ministru.

Nota ne’e haktuir, krize COVID-19 daudaun ne’e iha ona impaktu ne’ebé maka seidauk akontese durante ne’e ba kompañia aéreu hotu iha mundu tomak.

Iha semana ikus ne’e, operadór aéreu inklui Airnorth no Air Timor, fó sai ona sesasaun servisu no mós iha fatin seluk tan.

Medida hirak ne’e, mosu hanesan resposta ba restrisaun viajen nian ho eskala boot ne’ebé Governu fó sai hodi hapara propagasaun COVID-19, inklui restrisaun tránzitu no kuarentena ne’ebé Governu Singapura impoin ona.

“Sesasaun servisu aéreu hotu daudaun ne’e halo Timor-Leste sai izoladu, sein iha konetividade globál ne’ebé mak esensiál ba movimentu merkadoria, fornesimentu médiku sira ka ba transporte pasajeiru sira iha situasaun emerjénsia nian”, informa nota imprensa ne’e.

Akordu ne’ebé asina ona entre Governu Timor-Leste no Airnorth hodi garante kontinuasaun konetividade aérea nian ba Timor-Leste durante situasaun emerjénsia.

Bainhira krize globál COVID-19 la iha ona maka parte sira antesipa tranzisaun ba prestasaun servisu regulár pasajeiru nian sira.

Tanba ne’e, servisu Airnorth nian sei funsiona liuliu ba tula materiál médiku no merkadoria sira iha situasaun emerjénsia.

“Laiha buat ida mak importante liu fali saúde no ita-nia povu nia seguransa”, afirma Ministru Hermenegildo.

Governante ne’e subliña, surtu COVID-19 hanesan emerjénsia mundiál saúde públika ida ne’ebé sai preokupasaun internasionál no afeta ba nasaun barak iha mundu tomak.

“Tanba ne’e Governu Timor-Leste foti medida konkreta sira hodi proteje povu timor-oan no garante seguransa ba ita-nia nasaun”, nia adianta.

Tuir ministru ne’e, Governu halo nafatin serbisu to’o oras ne’e hodi garante solusaun ne’ebé lais no ekonómika ba konetividade aéreu nian.

Maski Airnorth rasik hakotu ona ninia servisu iha fatin barak tanba impaktu husi COVID-19, maibé kompañia aérea ne’e konkorda ona atu kontinua semo ba mai Dili dala-tolu semana ida, bazeia ba parseria ne’e.

“Ami alkansa ona akordu ne’ebé Governu asume parte ida husi kustu no simu reseita ba servisu ne’e, no ita hein atu ba oin iha tranzisaun neineik ba asesu ne’ebé boot liu no kontínuu ba pasajeiru sira bainhira restrisaun viajen nian daudaun ne’e hasai ona. Inisiativa ne’e sei importante mós ba ita-nia empreza sira ne’ebé depende liu ba ligasaun aérea sira ba transporte merkadoria sira nian”, nia tenik.

Ba inisiativa ne’e, Governu Timor-Leste agradese ba Airnorth ba ninia apoiu hodi mantein fleksibilidade ne’ebé hatudu husi ninia Responsável, Daniel Bowden, ne’ebé lidera pesoalmente prosesu negosiasaun nian.

“Ami hetan akonsellamentu ho di’ak husi Stephen Webb no ninia ekipa aviasaun DLA Piper, atubele garante katak akordu ne’e bele implementa lalais ona no ho kustu ne’ebé di’ak, no hanesan jestu ba ami-nia povu”, dehan Ministru Hermenegildo.

Nune’e, ministru Hermenegildo lori povu Timor-Leste nia naran, hakarak apresia profisionál saúde sira.

“Hakarak rekoñese korajen no serbisu maka’as ita-nia profisionál sira saúde nian durante krize ne’e. Ha’u hakarak mós atu rekoñese apoiu husi Governu Australianu ne’ebé permite realizasaun teste médiku sira iha Darwin no traballadór Airnorth hirak ne’ebé sei kontinua halo servisu ne’e durante tempu susar sira-ne’e”, realsa Portavós Governu ne’e.

Sorin seluk, Ministru José Agostinho da Silva hateten katak Governu iha responsabilidade garante nesesidade povu iha situasaun emerjénsia.

“Ita-nia Governu iha responsabilidade atu mantein rota tránzitu aéreu nian, hodi garante katak ita bele kontinua lori materiál atu ajuda ita-nia povu hodi hasoru dezafíu sira ne’ebé maihusi COVID-19”, nia salienta.

Entretantu, Airnorth aban sei to’o iha Timor-Leste iha tuku 14:35.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here