Selebrasaun Misa Kinta-Feira Santa iha Igreja Katedrál Vila-Verde, kinta (09/10). Imajen Tatoli/Egas Cristovão
Arsebispu ba Arkedioseze Metropolitana Dili, Don Virgílio do Carmo da Silva, bainhira prezide Misa Kinta-Feira Santa iha Igreja Katedrál, Vila-Verde, kinta (09/04). Imajen Tatoli/Egas Cristovão

DILI, 09 abríl 2020 (TATOLI) – Iha selebrasaun Misa Kinta-Feira Santa iha Igreja Katedrál Vila-Verde, Arsebispu ba Arkedioseze Metropolitana Dili, Don Virgílio do Carmo da Silva, iha ninia omília rekoñese selebrasaun Páskoa tinan ne’e espesiál tanba sarani sira selebra iha uma ho hakmatek atu evita distánsia sosiál, relasiona ho surtu COVID-19.

Nune’e mós, selebrasaun Misa iha Semana Santa ne’e ba dahuluk, Sarani ne’ebé akompaña direta misa la to’o na’in-sanulu tanba atu kumpre desizaun husi Governu ba medida Estadu Emerjénsia.

Igreja rasik deside ona atu sarani sira akompaña de’it Selebrasaun Misa Semana Santa iha ida-ida nia uma, liuhosi meiu komunikasaun sosiál.

“Coronavírus halo atividade barak maka para no halo ema barak hakmatek iha uma, nune’e mós labele partisipa iha Festa Páskoa nian iha Uma-Kreda. Buat hirak-ne’e hotu halo ita la sente, ita nian fuan dalaruma malirin hela ka dala ruma ita-nia fuan mós bain-bain hela”, dehan Don Virgilio.

 

Maski nune’e, Amu ne’e konsidera la’ós tanba sarani sira-nia hakarak atu tuir misa iha ida-idak nia uma maibé tanba atu evita propagasaun surtu COVID-19.

“Dalaruma ita husu ba ita-nia an saida maka Kinta-Feira Santa ka Páskoa besik duni ona. Loos duni, maibé partisipa Páskoa iha tinan ida-ne’e espesiál tanba hanesan tinan ne’ebé ita hotu sei la haluha no ita mós sei selebra Páskoa ida-ne’e ho maneira ida-ne’ebé espesiál tebes katak Páskoa ho pandemia”, tenik Dom Virgilo.

Biban ne’e, nia parte apela ba sarani sira atu reza iha ida-idak ninia uma hanesan saida maka halo ona iha Domingu Ramos, atu hametin fiar nafatin iha Páskoa.

“Hanesan ha’u fó hanoin ona ba ita boot sira, iha Domingu Ramos importante maka ita-nia desposizaun interiór, ita-nia vontade, ita-nia hakarak la’o hamutuk ho Jesus nia mate no nia moris hias. Selebrasaun ida-ne’e mai loke ita-nia fuan, mai loke odamatan imi-nia família ninian, hodi halibur hamutuk imi iha imi-nian oratóriu iha  imi-nia meza han nian, atu deskobre fali imi-nia família hanesan Jesus halo ba ninia eskolante sira iha han kalan ikus nian, ne’ebé ohin ita halo atu hanoin fali momentu importante ne’e”, dehan Bispu Deoseze Dili ne’e.

Entertantu, tuir observasaun jornalista Agência Tatoli nian iha Misa Kinta-Feira Santa iha Igreja Katedrál, ne’ebé hahú iha tuku 18:00, ema ne’ebé partisipa menus husi na’in-sanulu, kompara ho selebrasaun misa kada tinan iha igreja ne’e, ne’ebé túr fatin kuaze laiha tanba ema nakonu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here