DNSA Kontinua Halo Manutensaun ba Kanalizasaun Bee-Moos. Imajen/DNSA

DILI, 08 abril 2020 (TATOLI)–Xefe Departamentu Abastesimentu Água Munisípiu Dili, Francisco Xavier Pereira hateten, ekipa DNSA hahu hadi’a ona kanu distribuisaun bee-nian iha diresaun Lahane atu nune’e bee bele tama fali ba estasaun tratamentu Lahane no bele funsiona fila-fali.

Nia hatutan, kanu distribuisaun bee-nian ne’e aat nak sobu tanba dezastre naturál ka inundasaun ne’ebé afeta ba bee-mota sobu no halo tohar kanu distribuisaun bee-nian sai aat.

“Ami mós hahú hadi’a kanu distribuisaun bee-nian atu nune’e bee bele tama fali ba estasaun tratamentu Lahane no bele funsiona fila-fali estasaun refere para suporta komunidade sira iha Lahane hodi bele asesu”, dehan Xefe Departamentu Abastesimentu Água Munisípiu Dili, Francisco Xavier Pereira, ba Ajénsia TATOLI via telefone, kuarta ne’e.

Nia hatutan, bee ne’ebé iha mota Lahane nian labele to’o iha rezervatóriu tanba kanu estragu hotu ne’ebé mak kauza husi udan-boot iha fulan kotuk liubá.

“Tanba ne’e mak  área Lahane nian ami uza estasaun bomba mak ense fali ba rezervatóriu hodi ita-nia komunidade konsumu”, nia informa.

Entretantu, nai dehan, ligasaun kanu hosi bee Benamauk ninian, DNSA hadi’a ona nune’e kanu distribuisaun iha fatin hirak ne’e bele fó fornesementu bee ho di’ak liután ba nesesidade populasaun sira iha área Taibesse, Santa Cruz no área ne’ebé besik iha Lahane ninian.

Aleinde ne’e, nia hatutan, Diresaun Nasionál Servisu Água (DNSA) halo planu emerjénsia ba kanu boot sira ne’ebé mak estragu hotu ho kauza hosi udan-boot iha fulan kotuk, halo kotu no balu mota lori maibé to’o agora seidauk bele hadi’a tanba sei hein osan emerjénsia.

Xefe Departementu Abastesimentu, Servisu Agua no Saneamentu (SAS), Francisco Xavier Pereira. Imajen/Osória A.Marques

“Iha inundasaun fulan kotuk liubá, kanu ho ins-boot estragu hotu entaun DNSA iha planu emerjénsia,  oinsá ita tau sees tiha kanu iha mota laran, para tau fali kanu foun ida, nune’e komunidade sira bele asesu bee-moos,” nia hateten.

Maibé, nia informa, kanu ne’ebé mak aat natón, ekipa  DNSA hadi’a daudauk ona. Ida aat boot liu ne’ebé presiza mós osan no ekipamentu pezada entaun sei hein osan emerjénsia mak foin hadi’a, maibé DNSA iha meiu ida mak tau fali kanu foun nune’e bele uza.

“Ami preprara hotu ona dezenu, halo levantamentu tékniku iha terrenu atu nune’e ami lori ba iha Ajénsia Dedenvolvimentu Nasionál (ADN) atu verifika bainhira dehan loos ona entaun ita bele hala’o ona serbisu emerjénsia,” nia haktuir.

Entretantu, nia dehan, aleined hadi’a kanu distribuisaun bee-nian iha Lahane, ekipa DNSA mós hahú hadi’a ona kanu distribuisaun bee-nian iha diresaun hosi Bemori, Aituri-laran no Maloa nian.

Notísia Relevante: Komunidade Maloa iha Inisiativa Hadi’a Kanu Ne’ebé Tohar

Jornalista      : Osória Marques

Editór            : Cancio Ximenes

HAKEREK NO HATÁN

Please enter your comment!
Please enter your name here