Timoroan ne'ebé fila hosi Indonézia ho Australia kumpre ona kuarentena obrigatoriu iha Tibar ho INAP durante loron 14 nia-laran. Imajen/Antonio Goncalves

TIBAR, 09 abríl 2020 (TATOLI) – Abitante lubun ne’ebé durante loron 14 submete ba kuarentena obrigatóriu iha fatin kuarentena Tibar ho Edifísiu Institutu Nasional ba Administrasaun Públiku (INAP) kompromete sei sai mensajeiru di’ak iha familia no sosiedade kona-ba oinsá mak prevene-an hosi surtu Coronavirus ka COVID-19.

Notísia Relevante : Governu Re-integra Tan Abitante 52 hosi Kuarentena INAP ho Tibar

Reprezentante PNTL Munisípiu Liquiça entrega Sertifikadu hosi Ministeriu Saúde ba Timoroan ne’ebé kumpre ona kuarentena obrigatoriu durante loron 14 nia-laran. Imajen/Antonio Goncalves

Durante iha kuarentena laran, abitante lubun ne’ebé fila hosi nasaun afetadu Coronavirus ka COVID-19 aprende siénsia pedagójika ne’ebé partilla hosi Ministériu Saúde (MS) ho Organizasaun Mundiál Saúde (OMS) kona-ba próteze-an hosi propagasaun COVID-19.

Beni Gaspar, Policarno Amaral ho Adolfina Ximenes, reprezenta abitante-sira ne’ebé kuarentena iha INAP ho Tibar, afirma, sira-nia parte agradese tebes ba governu no entidade sira hotu, liuliu komunidade ne’ebé kolaborativu tebes hodi asegura sira-nia vida durante iha kuarentena obrigatóriu.

Abitante-sira ne’e hateten, simples no fasil tebes oinsá bele próteze-an hosi propagasaun COVID-19  mak obedese ba orientasaun  ka métodu MS ho OMS, mak hanesan fase-liman ho sabaun rutina, uza máskara, hela hakmatek iha uma bainhira la nesesita atu sai ho mantein distánsia sosiál ka distánsia fíziku.

“Ema hotu tenke ábitu loron-loron hodi implementa regra prevensaun COVID-19,” tenik Beni Gaspar nu’udar traballadór timoroan iha Austrália ne’ebé foin lalais fila hosi Austrália.

Ba Ajénsia Tatoli iha ámbitu serimónia re-integrasaun abitante-sira iha kuarentena Tibar ho INAP nian, ohin,  Beni Gaspar, Policarno Amaral ho Adolfina Ximenes, hateten, la iha meius seluk ne’ebé di’ak liu  atu prevene-an hosi propagasaun COVID-19 maka hela hakmatek iha uma, mantein distánsia sosiál,  fase-liman ho sabaun bainhira kaer servisu no depos kaer servisu.

Policarno Amaral hanesan estudante ne’ebé daudaun ne’e kontinua nia estudu iha universidade balun iha Jogjakarta-Indonézia hateten, nia ta’uk tebes ho propagasaun  COVID-19 tanba ne’e deside husik hela eskola hodi fila mai rai moris fatin.

“Ita tama kuarentena la signifika ita iha ona moras, ne’e laiha, maibé ne’e hanesan maneira prevensaun,” hateten Policarno.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here