Timoroan na’in 146 kontinua hala’o viajen hosi Indonézia mai Timor-Leste liuhosi Fronteira Batugade, Postu Administrativu Balibo, Munisípiu Bobonaro, kuarta (08/04/2020). Imajen/Eugénio Pereira

BATUGADE, 08 abríl 2020 (TATOLI)- Timoroan na’in 146  kompostu  hosi feto na’in  62 no mane na’in 84, ohin,  kontinua hala’o sira-nia viajen hosi Indonézia mai Timor-Leste liuhosi Fronteira Batugade, Postu Administrativu Balibo, Munisípiu Bobonaro.

Notísia Relevante : Governu Husu Timoroan iha Rai-Li’ur Labele Mai Timor-Leste

Abitante hirak ne’e hodi kalan toba iha edifísiu Konsuladu Timor-Leste iha Atambua, Indonézia,  ohin, hala’o viajen mai fronteira Motain akompaña hosi Konsul Timor-Leste ba Kupang, Jesuíno dos Reis Matos “Zito” no Konsul Timor-Leste ba Atambua, João Simão Sousa.

Ekipa Médiku COVID-19 rega hela ai-moruk líkidu desinfection ba sasán ne’ebé estudante sira hodi prevene surtu COVID-19. Imajen/Eugénio Pereira

Informasaun ne’ebé Ajénsia Tatoli kobre hosi Adjuntu Diretór Jerál Servisu Migrasaun,  Inspetór Xefe Roberto Santos, iha Postu Fronteira Batugade, katak, hosi totál Timoroan na’in 146 ne’e, na’in 16 tama ilegálmente hodi entrega-aan ba Polísia Unidade Patrullamentu Fronteira (UPF) iha área Badumera, Taliaran, hodi kontinua aprezenta kedas ba ekipa COVID-19 hodi teste sira-nia kondisaun saúde.

Liuhosi teste saúde ba Timoroan lubun ne’e hatudu katak sira-hotu livre hosi surtu Coronavirus ka COVID-19.

“Ita nia Timoroan sira ohin tama mai  ne’e maioria ita nia estudante sira, tanba problema ho dokumentu KITAS mak mate, entaun balun liu dalan ilegál, no ita nia UPF lori sira entrega ba ami too mai liu uluk hosi liña Saúde hodi haree sira-nia kondisaun saúde hotu- hotu iha kondisaun di’ak, maibé ekipa médiku sei akompaña nafatin sira hotu tenke hela iha fatin kuarentena ne’ebé ita nia governu prepara,” hateten Roberto Santos.

Notísia Relevante : Konsuladu TL ba Kupang ho Atambua Fasilita-Tan Estudante 58 Tama Hosi Batugade

Nia dehan, ba estudante sira ne’ebé tama ilegál, Migrasaun fó toleránsia tanba situasaun emerjénsia, maibé husu estudante sira tenke trata ona sira-nia dokumentu hodi prepara bainhira kondisaun normál sira bele fila ba Indonézia kontinua sira-nia estudu ho di’ak.

Migrasaun mós husu estudante hotu-hotu hosi Indonézia mai tenke liu dalan legál hodi koopera ho autoridade seguransa bele kontrola sira-nia movimentu para evita sira hosi surtu COVID-19.

Parte Migrasaun mós daudaun ne’e koloka membru na’in 12 hodi haforsa Servisu Migrasaun iha Postu Batugade nian.

Iha parte seluk, sidadaun Indonézia ne’ebé hela iha Timor-Leste mós kontinua movimentu hala’o viajen sai hosi Timor-Leste fila ba Indonézia.

Arlinda Cornelio Barros de Jesus Silva ho Maria Engracia da Cruz Fernandes, nu’udar estudante Timoroan  ne’ebé mai hosi Surabaya-Indonézia, deklara, sira-fila mai Timor-Leste hodi próteze-aan hosi ameasa surtu Coronavirus ka COVID-19.

“Ami fila too mai koordena ho ita-nia konsuladu iha Kupang no Atambua ne’ebé fasilita ami fila tanba atu evita-aan hosi surtu COVID-19,” dehan estudante na’in rua.

Estudante rua ne’e mós apresia no prontu koopera ho Governu Timor-Leste, liu-liu ekipa COVID-19 hodi lori sira ba hela iha fatin kuarentena obrigatóriu hodi bele kontrola nafatin sira-nia kondisaun saúde durante loron 14 molok fila ba hamutuk ho família.

Iha fatin hanesan, Komandante UPF, Superintendente Xefe  João Belo dos Reis dehan, UPF kontinua halo kontrolu másimu iha liña fronteira, tanba iha Postu UPF Oe-Cusse nian hodi kalan kaptura ema na’in tolu (3), Postu Badumera, Batugade, kaer estudante na’in 16 no Suia na’in ida.

Komandante UPF João Belo dos Reis, hatutan, agora daudaun movimentu ilegál komesa redús, tanba servisu UPF garante nafatin seguransa oras 24 nia laran.

Tuir observasaun Ajénsia Tatoli nota katak, movimentu transporte públiku sira ne’ebé tula sasán nesesidade báziku mós kontinua halo movimentu tama mai Timor-Leste.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here