DILI, 08 Abril 2020 (TATOLI)–Traballadór, Julião de Araújo hateten, nu’udar ema umana sempre tauk tanba moras COVID-19 ne’e perigozu ba ema-nia vida maibé hahan laiha ne’e bele mate hamlaha tanba de’it tauk COVID-19.

“Ami tauk moras Coronavirus ne’e maibé ami-nia nesesidade mak haruka ami nune’e. Tenke hein loja hodi hetan osan no sustenta ba família uma laran. Agora, ita sulan de’it uma laran, sé mak atu fó hahan ba ita. Bainhira ita tauk COVID-19, ita sei mate  hamlaha,” dehan Julião de Araújo ba Ajénsia TATOLI iha Raikotu, Comoro, Dili, kuarta ne’e.

Nia hatutan, sira serbisu mak hodi han maibé Estadu Emerjénsia ida ne’e bandu labele la’o entaun estadu hanoin netik nesesidade lian laek sira-nian, labele hanoin de’it mak haruka populasaun hakmatek iha uma.

Entretantu,Loja Yujia 666 nia na’in, Yu Sewae hateten, hanesan ema estraneiru mak hodi buka moris iha Timor-Leste maibé bainhira loja taka ne’e defisil ba sira atu selu traballadór sira tanba osan la to’o hodi selu.

“Ami husi rai liur mak mai faan sasán iha Timor-Leste. Se agora mak ami taka entaun ami lori saida mak hodi selu ba traballadór sira ne’e. Agora de’it ami loke loja hela maibé ema ladún sosa nune’e osan la to’o hodi selu,” dehan Yu Sewae ba Ajénsia TATOLI iha Loja Yujia 666, Raikotu, Comoro, Dili, ohin.

Yu Sewae hateten, maski iha Estadu Emerjénsia nia laran ema ladún barak mak sosa sasán maibé pasiénsia tanba liuhosi uitoan mak bele selu traballadór, selu ba uma no mós selu taxa ba Governu.

“Ami tenke loke mak foin hetan osan natón. Maski uitoan maibé tau hamutuk hodi selu ba uma ne’ebé mak ami aluga no selu taxa ba Governu inklui selu ita-nia traballadór sira,” nia dehan.

Tuir nia, koko taka loja iha loron hirak liubá maibé sente ba labele entaun sira loke loron rua. Sira loke tanba razaun rona informasaun husi Sekretáriu Estadu Profesionál no Empregu (SEFOPE) deklara katak tenke selu traballadór maski iha situasaun Estadu Emerjénsia nia laran.

“Ami hanoin labele se taka to’o fulan rua ka tolu ne’e, ami lakon no hetan osan hosi ne’ebé mak halo pagamentu. Uma ne’ebé aluga ne’e, fulan ida, ha’u selu $3.000 ba uma na’in ka rai na’in,” nia informa.

Entretantu, kompradór Mateus Eduardo informa, iha Estadu Emerjénsia sulan de’it iha uma sente la di’ak, entaun nia sai hosi uma hodi haree loza balu loke entaun aproveita sosa sasán konstrusaun.

“Estadu Emerjénsia, ami sulan iha uma de’it, sente la kontente. Nune’e, la’o sai mak haree loza loke, entaun ha’u mós aproveita sosa duni sasán konstrusaun nian,” nia dehan.

Kompradór husu ba Estadu bainhira hasai ona regra tenke forte no mantén nafatin nune’e ema labele movimentu iha dalan públiku.

“Ami hakarak Estadu halo regra hanesan Estadu Emerjénsia katak labele halo movimentu ba-mai. No, loza sira taka hotu, nune’e ema ida-idak izola iha nia uma. Agora Estadu dekreta tiha Estadu Emerjénsia maibé movimentu kontinua normál. Bainhira akontese nune’e ema barak hahú halo tuir malu sai,” nia sujere.

Notísia Relevante: Governu Husu Komunidade Kumpre Medida 16 Durante Estadu Emerjénsia

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here