DILI, 08 abríl 2020 (TATOLI)- Polísia Nasionál Timor-Leste (PNTL) sei foti medida ba atividade jogu hotu ne’ebé la kumpre ba regra estadu emerjénsia (EE).
Notísia Relevante : PNTL Rega Ai-Moruk Dezinfetante ba Sirkulasaun Transporte Públiku
Jogu sira ne’e mak hanesan futeból, jogu-mákina, Kasino, lotaria populár, raspadiña, bola guling, joga karta, futu-manu bingo no tipu jogu seluk ne’ebé iha relasaun ho halibur ema barak.
Komandante PNTL Munisípiu Dili, Superintendente Xefi Armando Monteiro, esplika, tuir dekretu governu númeru 3/2020 durante períodu implementasaun estadu emerjénsia la autoriza ba kualkér tipu atividade jogu desportivu inklui jogu tradisionais.
Ba jornalista-sira, ohin, iha Dili, Superintendente Xefe Armando Monteiro, informa, Komandu PNTL Dili mós simu ona pedidu hosi Diresaun Jerál Inspesaun Jogu, Ministériu Turizmu Komérsiu no Indústria (MTCI) atu iha períodu implementasaun estadu emerjénsia bele suspende atividade jogu sira-ne’e provizóriu.
“Se mak sei hala’o atividade jogu hirak ne’e PNTL Munisípiu Dili sei foti medida,’’ alerta Superintendente Xefe Armando Monteiro.
Armando Monteiro mós apela ba operadór ekonómiku hotu atu kontinua kria kondisaun hodi tau bee ho sabaun ba kompradór sira iha loja oin atu kompradór sira fase liman molok tama ba loja-laran.
Jornalista : Nelson de Sousa
Editór : Francisco Simões
