Mikrolete 012. Imajen Tatoli/Natalino Costa

DILI, 08 abríl 2020 (TATOLI) – Xefe Departementu Sinál Trázitu, Diresaun Nasionál Transporte Terrestre (DNTT), João Eugênio da Silva, husu ba motorista transporte públiku sira tenke kumpre Rezolusaun Governu nian, ne’ebé aplika iha medida sira Estadu Emerjénsia.

“Ha’u hanoin ita-nia rezolusaun ne’ebé Governu hasai iha medida sira iha Estadu Emerjénsia nian ne’e klaru ona, iha ne’ebá katak suspende provizóriu taxi, mikrolete no bis sira, hodi la halo operasaun durante períodu Estadu Emerjénsia. Durante ne’e sira kumpre hela”, nia dehan ba Agência Tatoli via telefónika, kuarta ne’e.

Tuir João Eugênio, suspensaun ne’e importante tebes tanba atu prevene moras Coronavírus ne’ebé maka alastra ona iha nasaun barak.

“Ha’u hanoin ita-nia motorista no ita hotu tenke komprende, tanba de’it Governu deside suspende provizóriu transporte sira, ha’u hanoin ita tenke koopera tanba moras ida ne’e rasik tanba hamate ona ema rihun ba rihun iha mundu ho nune’e ita tenke prevene”, hateten responsável ne’e.

Nia adianta, asaun prevensaun ida maka tenke suspende atividade operasaun transporte públiku iha Dili laran no munisípiu.

“Ha’u horiseik rona taxista sira preokupa kona-ba sira nian rendimentu no nesesidade, ne’e ita komprede, maibé dala-ida tan moras ida ne’e perigu tebes no bele afeta ba ema-nia saúde públika, ba ema nia vida. Tanba ne’e ha’u husu taxista sira tenke komprende hodi kumpre nafatin desizaun Governu nian, bainhira sira husu loke fali atividade operasaun maka bele halo”, dehan João Eugênio.

Kuandu seidauk iha desizaun atu transporte públiku halo operasaun, di’ak liu lalika tanba autoridade seguransa sira sei foti medida tuir desizaun Governu nian ne’ebé hatun ona.

“Ami husu atu motorista sira tenke kumpre desizaun sira, tanba se la kumpre maka Polísia sei foti medida tuir rezolusaun ne’ebé iha tanba ko’alia kona-ba distánsia sosiál tuir regulamentu ne’ebé maka Governu hasai atu sidadaun hotu prevene Coronavírus labele hada’et”, Xefe Departementu ne’e akresenta.

Nia apela ba sidadaun hotu, tantu motorista sira ne’ebé atu halo viajen husi fatin ida bá fatin seluk, liuliu bá munisípiu tenke kumpre regulamentu ne’ebé Governu hasai ona, hanesan kona-ba distánsia sosiál.

“Ida ne’e importante, maibé kuandu imi la kumpre desizaun saida de’it ne’ebé maka Governu foti maka Polísia sei foti medida”, João Eugênio subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here