Ministra Finansa ein ezersísiu, Sara Lobo Brites. Imajen Tatoli/Egas Cristovão

DILI, 08 abríl 2020 (TATOLI) –  Ministériu Finansa (MF) sei kria konta bankária ketak ida iha Banku Sentrál Timor-Leste (BCTL, sigla portugés) atu rai fundu COVID-19, hafoin halo ezekusaun.

Ministra Finansa ein ezersísiu, Sara Lobo Brites, informa Governu hahú diskute Dekretu-Lei ba ezekusaun Fundu COVID-19 ho totál millaun $150.

“Hafoin Dekretu-Lei ne’ebé aprova iha Konsellu Ministru no submete ba Prezidente Repúblika promulga tiha maka Ministériu Finansa sei loke konta Bankária iha Banku Sentrál. Governu halo ona pedidu ba Banku Sentrál atu nune’e transfere osan Fundu COVID-19 ba konta ne’e hafoin Governu halo ezekusaun”, tenik atuál Vise-Ministra Finansa iha Sentru Konvesaun Dili (CCD, sigla portugés), kuarta ne’e.

Notísia Relevante: KM Aprova Dekretu-Lei Regula Fundu COVID-19 Millaun $150

Tuir Sara Lobo, ezekutivu sira mós diskute ona mekanizmu atu Fundu COVID-19 ne’e bele aprova proposta sira husi liña interministeriál.

“Hetan ona aprovasaun husi Konsellu Ministru, maibé sei iha alterasaun balun no espera katak tempu badak bele haruka ona ba Prezidente Repúblika hodi promulga ho nune’e ita bele hahú ezekuta Fundu COVID-19 ne’e”, Ministra Sara akresenta.

Kona-ba mekanizmu ezekusaun Fundu COVID-19, Sara Lobo dehan Parlamentu Nasionál autoriza ona no Prezidente Repúblika promulga ona, maibé Governu sei haree nia  mekanizmu ezekusaun.

“Ita sei kria tan mekanizmu ezekusaun atu hanesan ho Dotasaun Orsamentál Temporária (DOT), maibé depende ba Dekretu-Lei no hein Prezidente promulga mak foin bele aplika mekanizmu ezekusaun”, governante ne’e adianta.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here