Ilustrasaun COVID-19. Imajen/Espesiál

DILI, 08 abríl 2020 (TATOLI)—Bankada Parlamentár Frente Revolusionária Timor-Leste Independente liuhosi Sekretariadu Bankada Parlamentár FRETILIN hateten, luta kontra COVID-19 presiza ema hotu nia kontribuisaun maibé husik ba Governu mak foti desizaun ba mekanizmu prevensaun.

“Luta kontra COVID-19 presiza ita hotu nia kontribuisaun, liuhosi ida-idak nia knaar, hodi ita hotu bele kompleta malu no kontribui ba luta naruk ne’ebé mundu tomak enfrenta. Tanba ne’e, Bankada FRETILIN halo apelu atu ema hotu ne’ebé la halo parte órgaun soberanu ezekutivu, atu husik Governu mak buka no foti desizaun ba mekanizmu prevensaun no asaun ne’ebé nesesáriu no posivel  atu halo iha Timor-Leste,” haktuir komunikadu imprensa ne’ebé Agência TATOLI asesu hosi Sekretariadu Bankada Parlamentár FRETILIN iha Parlamentu Nasionál, kuarta ne’e.

Komunikadu ne’e hateten, Bankada Parlamentár FRETILIN apelu atu líder polítiku sira hotu edukativu no sai ezemplu ba povu tomak kona-ba kumprimentu ho medida sira ne’ebé hatuur ona liuhosi Dekretu Prezidente no Dekretu Governu ba Estadu Emerjensia relasiona ho Prevensaun ba surtu COVID-19 niian.

Entretantu, komunikadu ne’e haktuir, Bankada FRETILIN kestiona maka’as ba Ajénsia Dezenvolvimentu Nasionál (ADN) ne’ebé iha tersa (07/o4/2020) publika iha ninia pájina Facebook katak Xanana Gusmão konvoka no fó orientasaun ba ADN no Diretór Ministériu Saúde atu prepara instalasaun Antigu Hospital iha Lahane atu halo ba fatin izolamentu ba pasiente ne’ebé pozitivu ho COVID-19.

“Bankada FRETILIN haree asaun ida-ne’e hanesan tentativa ida tán atu interfere iha kna’ar ne’ebé la’ós Xanana Gusmão ninian maibé kna’ar Governu nian ne’ebé agora lidera hosi Primeiru-Ministru, Taur Matan Ruak.  Xanana Gusmão ne’ebé rekuza atu tuir tomada de pose atu sai ministru iha VIII Governu Konstitusionál, bainhira halo asaun hanesan ne’e hatudu momoos katak hakarak obriga “podér informál” mak atu domina no ida-ne’e la eduka ita-nia povu no la kontribui ba estabilidade iha rai laran no hanaruk tán impase polítiku,” komunidade ne’ebé fó-sai hosi Bankada FRETILIN ne’e hateten.

Bankada Parlamentár FRETILIN akresenta, iha tempu ne’ebé Timor-Leste hala’o hela prosesu konstrusaun Estadu, hahalok ida- ne’e la ajuda haforte instituisaun Estadu nian. Asaun “podér informál” ida-ne’e hanesan meiu ne’ebé atu minimiza no dezautoriza Estadu liuliu instituisaun ezekutivu Estadu nian ne’ebé daudaun ne’e lidera hosi Primeiru-Ministru, Taur Matan Ruak.

“Fatin ne’ebé señor Xanana hili, la’os fatin apropriadu atu halo fatin izolamentu tanba estudu ida-ne’ebé enjeñeiru hosi Xina halo iha tinan 2003 ka 2004 bainhira elabora Planu Urbanizasaun ba I Governu Konstitusionál, hatudu katak área ne’ebá iha rai (solo) ne’ebé mamar no ho risku erozaun maka’as. Tanba ida-ne’e konstrusaun ne’ebé de’it mak atu halo iha ne’ebá, iha risku boot atu monu, tanba rai halai,” Bankada Parlamentár FRETILIN hateten liuhosi komunikadu imprensa ne’e.

Hatán ba kestaun ne’e, Xefe Bankada Parlamentár CNRT, Duarte Nunes afirma, Xanana Gusmão nia intensaun ida de’it mak atu kombate COVID-19 ne’e no enkoraja ema hotu-hotu prepara-aan hodi halo prevensaun hasoru surtu COVID-19.

“Ne’e hanesan hanoin ida hosi Maun Boot Xanana. Karik, Governu konkorda bele tau osan hodi halo. Osan ne’e, ami aprova ona no Governu hakarak halo bele halo. La halo mós, sé mak atu obriga Governu atu halo. Buat ida surtu COVID-19 ne’e, atu kombate entaun tenke iha inisiativa hosi parte hotu-hotu, ne’e ajuda de’it, la husu osan ne’e. Sira (FRETILIN) hakarak de’it osan mak halo karik,” dehan Duarte Nunes ba Agência TATOLI liuhosi entrevista via telefone, kuarta ne’e.

Duarte Nunes afirma, prevensaun antesipa COVID-19 ne’e la’ós tuur iha fatin mak ko’alia de’it maibé presiza asaun no asaun ne’e mak Xanana Gusmão halo daudaun ne’e.

“Sé ema mate tiha, sira (FRETILIN) ba atu halo saida. Katuas Xanana halo atividade ne’e, la sala ida. Ajuda ema ne’e, sala ka. Nusá mak Marí Alkatiri la tuun ba halo hanesan katuas Xanana halo daudaun ne’e. FRETILIN ko’alia ne’e, hanesan laran moras,” nia dehan.

Maske nune’e, Xefe Bankada CNRT ne’e konsidera opiniaun hosi Bankada FRETILIN ne’e normál maibé bankada FRETILIN tenke hanoin katak moras ne’e kuandu mosu mai ne’e la haree ba sé de’it.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here