Konstrusaun fatin kuarentena ne’ebé seidauk remata, halo estudante-sira ho pasiénsia tenke tuur hein de’it iha jardín laran, kuarta (08/04/2020). Imajen/Eugénio Pereira

BATUGADE, 08 abríl 2020 (TATOLI)- Konstrusaun ba fatin kuarentena provizóriu ne’ebé estabelese  iha Merkadu Tradisionál Postu Integradu Batugade, Postu Administrativu Balibo, Munisípiu Bobonaro too agora seidauk remata.

Notísia Relevante : MS Hahú Instala Kuartu 300 iha Kuarentena Batugade

Merkadu Postu Fronteira Batugade ne’ebé deside atu sai fatin kuarentena. Imajen/Eugénio Pereira

Administradór Postu Balibo, Rosário Gonçalves dehan, tuir oráriu serbisu hosi governu liuhosi Ministériu Saúde atu harii kuartu 300 iha fatin kuarentena Batugade, maibé too agora serbisu la’o neineik.

“Kuartu balun maka halo remata ona, no balun seidauk hotu, tanba negosiante balun ne’ebé okupa merkadu ne’e lakohi atu muda sai,” informa Administrador Postu Balibo, Rosario Gonçalves, ba jornalista, ohin, iha Balibo.

Nia dehan, negosiante sira lakohi atu muda sira ho razaun sira sasán nesesidade báziku ne’ebé foin kompras sei rai nakonu hela iha loja laran.

Bainhira Administradór Postu halo negosiasaun ho negosiante-sira, mosu dezentendimentu no  negosiante-sira deklara seidauk prontu atu husik fatin ne’e ho razaun governu maka fó autorizasaun haruka sira taka fatin negósiu hodi kumpre regra estadu emerjénsia, mas la’ós atu hasai sira-nia sasán hosi merkadu laran.

 Negosiante sira ne’e husu ba governu bainhira atu muda sira sai tenke buka fatin alternativa seluk hodi labele afeta ba sira-nia atividade negósiu.

“Ami la kontra desizaun estadu atu uza fatin ne’e, tanba fatin ne’e estadu nian, maibé agora ami nia sasán nakonu hela. Se estadu dehan atu hasai ami bele sai, agora sasán nakonu hela ne’e ami atu fa’an ba se mak sosa no ami atu muda loos ba ne’ebé,” tenik  negosiante ida.

Administradór Balibo ne’e promote katak, nia sei hato’o problema ne’e ba governu hodi buka alternativa ba negosiante sira hodi koopera.

Antes ne’e, Diretór Kompañia Nasionál Remistader, Tomas Pereira ne’ebé ezekuta serbisu konstrusaun ba kuarentena ne’e dehan, sira sei halo serbisu tuir alvu ne’ebé governu husu para fasilita lalais fatin kuarentena ne’e.

Molok ne’e mós Diretór Sentru Saúde Munisípiu Bobonaro, João Cardoso dehan, bainhira kontrasaun remata ona, ekipa sei monta fasilidade tuir desizaun governu nian hodi simu ona Timoroan sira ne’ebé hala’o viajen liu Fronteira Motain-Indonézia atu submete ba kuarentena obrigatóriu durante loron 14 nia-laran.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here