Diretór Kompañia Parapa Remiziuu Star Unip, Lda, Rogério Ximenes.

DILI, 08 abril 2020 (TATOLI)–Kompañia Parapa Remiziuu Star Unip, Lda, rezeita traballadór balu ne’ebé hateten sira la hetan ekipamentu protesaun hodi proteje sira-nia an iha atividade rekolla lixu iha área Postu Administrativu Dom Aleixo, Dili.

Diretór Kompañia Parapa, Rogério Ximenes  hateten, traballadór balu ne’ebé hateten laiha ekipamentu protesaun ba sira hodi proteje an hanesan máskara no luvas ne’e la laloos.

“Ami rezeita traballadór balu ne’ebé mak dehan sira laiha ekipamentu protesaun ba sira hanesan máskara no luvas, ne’e la loos. Ami hakarak atu dehan de’it katak traballadór sira ne’ebé mak serbisu iha Kompañia Parapa nian ne’e, sira mak lakohi uza bainhira ami fahe ba sira no ami mós halo monitorizasaun ba sira. Ikus mai, ami haree balu la uza ho razaun la toman no balu uza fali sira-nia faru,” dehan Rogério Ximenes ba Ajénsia TATOLI liuhsi entrevista via telefone,  kuarta ne’e.

Notísia Relevante: Mário de Deus: “Ami Presiza Ekipamentu Protesaun”

Nia hatutan, Kompañia Parapa hetan kontratu hosi Governu liuhosi Ministériu Administrasaun Estatal hafoin parte kompañia fó kontratu de’it ba kareta na’in ho montante orsamentu hamutuk $1.300 ne’ebe kobre ba karreta 24 ho kombustivél no kondutór inklui traballadór sira.

Iha biban Estadu Emerjénsia ida ne’e, nia hatutan, Kompañia Parapa kontinua mantén hodi kontibui serbisu atu rekolla lixu iha Sidade Dili liuliu iha parte Postu Administrativu Dom Aleixo nian.

Kada loron ida, nia hateten, karreta 24 ne’ebé kompañia kontrata ne’e, bazeia ba akordu serbisu tenke rekolla foer dala tolu iha loron tomak ida-nia laran.

“Ami halo akordu ho na’in ba kareta katak kada kareta iha traballadór na’in haat (4) ho kondutór ida. Traballadór ne’ebé mak serbisu tuir kareta 24 ne’e hamutuk 120 kompostu husi kondutór 24 no traballadór 96,” nia dehan.

Nia hateten, to’o agora Kompañia Parapa seidauk simu informasaun kona-ba subsidiu hosi Governu relasiona ho Estadu Emerjénsia tanba traballadór sira ne’e hetan kontratu hosi kareta na’in. Entaun, atu asegura no proteje traballadór sira ne’e, karreta na’in mak bele atende ida ne’e.

“Preokupasaun traballadór nian iha terrenu ne’ebe mak hateten katak kompañia la fó ekipamentu hanesan máskara no luvas ne’e, ha’u hakrak dehan ba públiku katak ne’e la’ós kompañia nia responsabilidade maibé karreta-na’in nia responsabilidade,” nia hateten.

Na’in ba Kompañia ne’e afirma, na’in ba kareta mak kontratu traballadór ho kada kareta mak na’in rua ka tolu, ne’e iha sira-nia kompeténsia. Maibé, tuir nia, Kompañia Parapa kontrata traballadór mak kada kareta ida iha ema nain lima (5) inklui ho kondutór ida.

Nia infroma, kompañia hetan kontratu hosi Governu ba fulan tolu de’it depois loke fali kontratu foun mak kompete tan. Tanba agora Estadu no Governu iha situasaun atuál Governu la’o ho osan duodésimu, entaun lei aprovizionamentu la fó dalan atu ministériu relevante atu loke kontratu foun.

“Iha ne’e Governu estende de’it ami-nia kontratu fulan ida-ida tan bainhira mak sira observa ba ami-nia serbisu mak di’ak, sei estende. Maibé bainhira serbisu la di’ak, sira sei hapara ami-nia kontratu,” nia esplika.

Entretantu, Kondutór Zeca Freitas nu’udar na’in ba kareta ho númeru banner (spanduk) 20 hateten, ekipamentu protesaun ba traballadór iha no fahe ona ba sira maibé sira mak lakohi uza.

“Seidauk iha Estadu Emerjénsia ami prepara ekipamentu protesaun ba traballadór sira ne’e kompletu maibé ita-nia traballadór sira mak lakohi uza liuliu hanesan máskara no luvas. Tanba ita hatene katak bainhira sira suru no foti foer ne’e sempre kontaminadu ona virus tanba lixu ne’e iha oin-oin. Lixu balu dodok no balu iis ona katak nia iha ona virus,” nia dehan.

Nia haktuir, molok karreta ne’e hetan kontratu husi Kompañia Parapa tenke iha kritériu balu ne’ebé mak tenke konklui hafoin bele simu.

“Kritériu sira hanesan kareta kondisaun tenke di’ak. Ekipamentu ba traballadór no ba sasan kareta nian mós tenke iha. Hanesan kanuru soru foer, lona kiik no boot hodi uza taka ba kareta bainhira udan no kiik uza hodi tau foer ba leten no fakar ba kareta laran,” nia informa.

Notísia Relevante: Laiha Estadu Emerjénsia ba Ekipa Saneamentu

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here