Serbisu nain sira raut foer. Imajen Tatoli/Cipriano Colo

DILI, 08 abril 2020 (TATOLI)–Supervizór Kompañia Nelces, Sabino Seran informa, relasiona ho estadu emerjensia no hamutuk kontra surtu COVID-19, kompañia prepara ekipamentu protesaun hanesan máskara ho luvas no mós ai-moruk dezinfetane ba traballadór sira ne’ebé mak rekolla lixu iha Postu Adminisitrativu Vera Crus, Munisípiu Dili.

“Ai-moruk dezinfetante ne’e ba ami importante tanba ita-nia traballadór sira. Bainhira sira ba rekolla lixu, primeiru, sira tenke uza ai-moruk dezinfetante hodi rega ba lixu hafoin mak bele foti no fakar. Atu nune’e, lixu ne’ebé mak keta kontamina ho virus ruma karik labele afeta ba sira-nia vida,” dehan Supervizór Kompañia Nelces, Sabino Seran, ba Ajénsia TATOLI via telefone, kuarta ne’e.

Sabino Seran hateten, ai-moruk dezinfetante ne’e Kompañia Nelces iha inisiativa rasik hodi prodús no distribui ba karreta kontratuál sia (9) ne’ebé sira fó kontratu hodi rekolla lixu.

“Ami prodús mesak ai-moruk dezinfetante hodi distribui ba kareta kontratuál sia (9) e’ebé mak rekolla lixu. Bainhira lixu tau iha karreta mak barak liu entaun ami ba direta ba terenu hodi rega tiha mak foin sira lori ba fakar iha Tibar,” nia hateten.

Aleinde ne’e, nia dehan, sira fahe hotu ona ekipamentu hanesan máskara no luvas ba sira maibé dala barak sira la uza tanba sira sente kosar ho fuma entaun sira tenke hasai. Maibé la signifika laiha ekipamentu ka la distribui ba sira.

Kona-ba saláriu, nia hatán, traballadór sira hetan saláriu bazeia ba estandarizasaun saláriu mínimu hosi Sekretáriu Estadu Profesionál no Empregu (SEFOPE) hamutuk $115.

Maibé, nia onestu, iha Estadu Emerjénsia ne’e Kompañia Nelces laiha subsidiu ba traballadór sira. Tanba, tuir nia, Kompañia Nelces hetan kontratu hosi Governu hafoin kompañia fó kontratu fali ba karreta na’in entaun signifika karreta na’in mak bele responsabiliza ba subsidiu ne’e.

Tuir nia, Kompañia Nelces serbisu bazeia ba Estadu Emerjénsia iha dekretu lei ne’ebé mak Prezidente Repúblika dekreta 28/2020 iha artigu 26 kona-ba bens servisu sosiais públiku iha aliña “h”, iha ne’ebá mensiona kona-ba serbisu rekolla lixu.

“Tanba ne’e, iha Estadu Emerjénsia serbisu rekolla lixu ne’ebé responsavél ba Postu Administrativu Vera Crus ninian, normalmanete ami sei la’o hanesan baibain. Maibé, ami iha mudansa uitoan kona-ba oráriu mak agora rekolla komesa iha oras 06:00 maibé antes ne’e ami rekolla lixu iha oras 05:00 dadeer. Ami iha mudansa ba oráriu tanba sei kontinua to’o tuku 10:00 hafoin mak ba fakar,” nia dehan.

Nia informa, Kompañia Nelces iha kareta sia (9) no traballadór hamutuk 45 inklui ho kondutór ne’ebé mak durante ne’e lori karreta rekolla lixu iha parte Postu Administrativu Vera Crus nian.

Notísia Relevante: Kompañia Parapa Rezeita Traballadór La Hetan Ekipamentu Protesaun

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here